Լեռնային Ղարաբաղի Անվտանգության խորհրդի քարտուղար Վիտալի Բալասանյանը չի բացառում, որ 2020 թվականին կարող է պայքարել նախագահի պաշտոնի համար:
«Ժամանակները ցույց կտան, ժամանակավրեպ է՝ հիմա ասենք այո կամ ոչ», – «Ազատության» հետ զրույցում հայտարարել է նա:
Վիտալի Բալասանյանը արդեն մեկ անգամ՝ 2012-ին նախագահի թեկնածու էր առաջադրվել: Այն ժամանակ նա որպես ընդդիմադիր թեկնածու ստացել էր ձայների 32 տոկոսը: 66 տոկոս ձայնով այդ տարի նախագահ ընտրվեց Բակո Սահակյանը:
Սահմանադրական փոփոխություններից հետո Ղարաբաղի խորհրդարանը երեք օր առաջ երեք տարի ժամկետով անցումային նախագահ ընտրել է այդ պաշտոնը արդեն տասը տարի զբաղեցնող Բակո Սահակյանին: Ղարաբաղի քաղաքական ուժերի մեծամասնությունը պնդում է, որ Սահակյանը 2020 թվականի նախագահական ընտրություններին էլ կարող է առաջադրվել, քանի որ օրենքը դա թույլ է տալիս:
Վիտալի Բալասանյանը, մինչդեռ, ասաց՝ չի պատկերացնում, թե Բակո Սահակյանը կարող է նախագահի պաշտոնի համար նաև 2020 թվականին պայքարել: «Չեմ կարծում, որ գործող նախագահը 2020 թվականին կառաջադրվի: Դա իր անձնական մոտեցումները կլինի, բայց իմ անձնական կարծիքը նա է, որ ես չեմ պատկերացնում», – նշել է նա:
Ղարաբաղում հերոսի կոչում ունեցող Բալասանյանը Զինված ուժերի պահեստազորի գեներալ է, անցած տարի այս օրերին նա Երևանում ոստիկանության պարեկապահակետային ծառության (ՊՊԾ) գնդի տարածքը գրաված «Սասնա ծռեր» զինված խմբի անդամների և իշխանության միջև բանակցություններն էր վարում: Վերադառնալով Ղարաբաղ՝ Բալասանյանը ստանձնեց Անվտանգության խորհրդի քարտուղարի պաշտոնը:
Մանրամասները՝ սկզբնաղբյուր կայքում
