ՀՅԴ մասնակցությունը իշխող կոալիցիային ինքնանպատակ չէ. կայացել է ՀՅԴ Բյուրոյի և ՀՀ ԳՄ համատեղ նիստ

Հայաստանում հրավիրված ՀՅԴ Բյուրոյի լիագումար նիստից հետո տեղի է ունեցել ՀՅԴ Բյուրոյի եւ ՀՅԴ Հայաստանի ԳՄ համատեղ ընդլայնված նիստ, որին մասնակցել են Դաշնակցության Հայաստանի մարզային կոմիտեների ներկայացուցիչներ, ՀՀ ԱԺ ՀՅԴ խմբակցության պատգամավորներ, ինչպես նաեւ Հայաստանի գործադիր մարմնի Դաշնակցության բարձրաստիճան պաշտոնյաներ:

Բացելով նիստը` ՀՅԴ բյուրոյի ներկայացուցիչ Հրանտ Մարգարյանը կարևորել է նման հանդիպումը` շեշտելով, որ կա պարբերաբար անհրաժեշտություն հետահայաց արժևորել կատարված աշխատանքը, վեր հանել խնդիրները ու գտնել դրանց լուծումները: «Դաշնակցության մասնակցությունը ՀՀ կառավարող կոալիցիային ինքնանպատակ չէ. մենք ընդունեցինք կոալիցիայի մաս կազմելու առաջարկը, որպեսզի մասնակիցը դառնանք երկրում արմատական փոփոխությունների իրականացմանը»,- նշել է Հրանտ Մարգարյանը: Նիստում զեկույցներով հանդես են եկել նաեւ Հայաստանի կառավարության անդամ Դաշնակցության ներկայացուցիչ նախարարները, ներկայացրել այն հիմնական ծրագրերը, որոնք իրականացվում են:

Հարց ու պատասխանի եւ քննարկումների արդյունքում համատեղ նիստից հետո պատրաստվել է ՀՅԴ բյուրոյի և Հայաստանի Գերագույն Մարմնի համատեղ հայտարարություն, որն առաջիկայում կհրապարակվի:

 

Լուսանկարը՝  Photolure-ի