Էրդողանը նախընտրական նոր խոշոր ծրագրեր է ներկայացրել

Թուրքական Zaman թերթի փոխանցմամբ, երեկ Թուրքիայի վարչապետ Էրդողանը Ստամբուլում ներկայացրել է 18 խոշոր նախագծեր, որոնք առնչվում են Իզմիր (8), Դիարբեքիր (7) և Ստամբուլ (3) քաղաքներին։ Այդ նախագծերը պետք է կյանքի կոչվեն մինչև 2023 թվականը՝ Թուրքիայի Հանրապետության հիմնադրման 100-ամյակը։

Դիարբեքիրում կառուցվելու են հազարավոր բնակարաններ, ներկայիս օդանավակայանն օգտագործվում է թե՛, քաղաքացիական, թե՛ ռազմական նպատակներով։ Նախատեսվում է կառուցել նոր օդանավակայան, և դրանք տարանջատել միմյանցից։ Մեծ զարկ է տրվելու տեղի հողագործությանը, ինչի արդյունքում կբացվեն 318,000 նոր աշխատատեղեր։ Բացվելու է երկու մեծ հիվանդանոց, որոնցից մեկն ունենալու է 630 մահճակալ, իսկ մյուսը՝ 400։

Ստամբուլի հետ կապված՝ վերակազմավորվելու է նրա կենտրոնում գտնվող Թաքսիմ հրապարակը, ինչը Էրդողանի երազանքն է դեռ այն ժամանակից, երբ նա զբաղեցնում էր Ստամբուլի քաղաքապետի պաշտոնը։ Ստամբուլի եվրոպական ու ասիական հատվածներում կառուցվելիք նոր «քաղաքներն» ունենալու են իրենց հիվանդանոցները։ Եվրոպական հատվածի հիվանդանոցն ունենալու է 2000 մահճակալ։ Ստամբուլում ստեղծվելու է 1131 մետր երկարությամբ ծառուղի։

Իզմիրում էլ կառուցվելու են նոր ավտոճանապարհներ և 2500 մետր երկարությամբ թունել։ Մեծ ուշադրություն է հատկացվելու քաղաքի նավահանգստի հետ կապված խնդիրներին։

Հիշեցնենք, որ Էրդողանը Ստամբուլի քաղաքապետ է դարձել 1994 թվականի մարտի 27-ին և պաշտոնավարել մինչև 1998 թվականի նոյեմբերի 6-ը։ 1998 թվականի փետրվարի 21-ին թուրքական դատարանը կրոնական ու ռասիստական ատելություն բորբոքելու համար Քրեական օրենսգրքի 312-րդ հոդվածի 2-րդ կետով Էրդողանին դատապարտել է մեկամյա բանտարկության և նշանակել 860 միլիոն (հին) թուրքական լիրա տուգանք (ցույցերից մեկի ժամանակ Էրդողանն արտասանել էր. «Մինարեթները մեր սվիններն են, գմբեթները՝ մեր սաղավարտները, մզկիթները մեր զորանոցներն են, իսկ հավատացյալները՝ մեր զինվորները»):

Էրդողանի բողոքարկումից հետո նախ այդ պատժաչափը նվազեցվեց մինչև 10 ամսվա, իսկ տուգանքը՝ մոտ 177 միլիոնի, ապա Թուրքիայի Վճռաբեկ դատարանը 1998 թվականի սեպտեմբերի 24-ին վճռեց, որ Էրդողանը բանտում պետք է անցկացնի 4 ամիս:

Էրդողանը բանտից, ուր հայտնվել էր 1999 թվականի մարտի 26-ին, դուրս եկավ հուլիսի 24-ին։