«Հրապարակ» օրաթերթի գլխավոր խմբագիր Արմինե Օհանյանն այսօրվա խմբագրականում գրում է.
«Երբ երեկ տպագրում էինք տեղեկությունն այն մասին, որ տարբեր համակարգերի քննչական մարմինների միավորումից ձևավորվող կառույցն ստեղծվելու է մինչև տարեվերջ, և այն գլխավորելու է ՀՀ նախկին գլխավոր դատախազ Աղվան Հովսեփյանը, չէինք պատկերացնում, որ հենց նույն օրը կհրապարակվեր ՀՀ նախագահի հրամանագիրն այդ կառույցի ձևավորման աշխատանքները կազմակերպող հանձնաժողովի ստեղծման մասին: Փաստորեն, ճիշտ էին այն տեղեկությունները, որ Աղվան Հովսեփյանին թոշակառուի կարգավիճակ չի սպառնում, և նրա հաջորդ պաշտոնը պակաս կարևոր չի լինելու, քան նախորդը: Արդյո՞ք այսպիսի հզոր և կենտրոնացված քննչական ծառայություն ունենալը նպատակահարմար է մեր երկրի համար: Ըստ պաշտոնական տեղեկատվության՝ այս կառույցի մեջ են միավորվելու ոստիկանության, պաշտպանության նախարարության և Պետեկամուտևերի կոմիտեի քննչականները: Միայն Հատուկ քննչական ծառայությունը չի մտնելու այս կառույցի մեջ: Եթե քննչական մարմինները մեկ՝ անկախ կառույցի մեջ կենտրոնացնելն, է այս քայլի իմաստը, ապա ինչո՞ւ դրա մեջ չի մտնում ՀՔԾ-ն: Եվ, ընդհանրապես՝ եթե ոստիկանության կամ ՊՆ համակարգերում հնարավոր չէ անկախ քննություն իրականացնել, ապա ինչպե՞ս կարող է նախաքննությունն անկախ լինել առհասարակ ու հատկապես Աղվան Հովսեփյանի ղեկավարության ներքո: Եվ եթե գլխավոր դատախազի պաշտոնում Աղվան Գառնիկիչն իրեն սպառել է, և տարիքն էլ փոքր չէ, ապա ինչպե՞ս պետք է կայացնի այս հսկայական նոր կառույցը զրոյից: Մի բան պարզ է՝ Սերժ Սարգսյանը կտրուկ քայլեր չի անում, չի ուզում ոչ մեկին նեղացնել, ոչ մեկին չի զրկում իր բարեհաճությունից և չի հեռացնում կերակրատաշտից: Ամեն ինչ անում է, որ երկրում դժգոհությունը չավելանա, և իշխանությունից բողոքողների շարքերը չհամալրվեն»:
