«Սասնա ծռերի» գործով չկա դատական նիստ, որը չուղեկցվի էպոտաժային որևէ իրադարձությամբ, որը կապ չունի ո՛չ իրավական, ո՛չ էլ քաղաքական գործընթացի հետ: Ասենք, բանականության տեսանկյունից անբացատրելի է ամբաստանյալների խոշտանգումը ոստիկանների կողմից կամ այն փաստը, որ ամբաստանյալները «ճշտով» հրաժարվում են ոտքի կանգնել դատարանում:
Դատական այսօրվա նիստն էլ նշանավորվել է «ասեղի» խորհրդավոր պատմությամբ:
Այսօրվա դատական նիստին դատական կարգադրիչները հերթական զննության ժամանակ մոտ 7 սմ երկարության ասեղ են հայտնաբերել դատական նիստին հետևող քաղաքացիներից Անահիտ Մուրադյանի և Լաուրա Զաքարյանի մոտ:
Դատական կարգադրիչներին քաղաքացիները հայտնել են, որ այդ ասեղները բաժանում են դատարանի շենքից դուրս: Զուգահեռաբար, ՀՀ ԱՆ ՔԿՎ հանրային կապերի բաժնից էլ հայտնել են, որ այսօր՝ դատական նիստի տեղափոխվելուց առաջ, «Նուբարաշեն» քրեակատարողական հիմնարկում Արեգ Կյուրեղյանի մոտից հայտնաբերվել է մաստակի մեջ թաքցրած մեկանգամյա օգտագործման սափրիչից առանձնացված ածելու սայր, ինչն արգելված իր է:
Ասեղը կամ սուր գործիքը կալանավորների կամ դատապարտյալների կողմից օգտագործվում են ինքնախեղման նպատակով, երբ նրանք այդ քայլով արտահայտում են իրենց բողոքը կամ ցանկանում են հանրային ուշադրություն գրավել իրենց անձի վրա: Արդյո՞ք «ծռերը» կամ նրանց համակիրներն այսօր մտադրվել էին դատարանի դահլիճում ինքնախեղման ակցիա կազմակերպել, «ծռերի» ինչի՞ն է պետք դատավարության շուրջ լարվածությունը, երբ նրանք համոզված պնդում են, որ այս գործընթացում ամբաստանյալի աթոռին ոչ թե իրենք են, այլ իշխանությունը, որին մտադիր են մերկացնել դատական նիստերի ժամանակ: Այս հարցերը դարձյալ բացատրելի չեն իրավական և քաղաքական տրամաբանությամբ:
Այս դատական գործընթացը խայտառակներից մեկն է մեր պատմության մեջ, որի ընթացքում իշխանությունն ու «ծռերը» դրսևորում են, ըստ էության, խուլիգանական վարքագիծ: Օդում անբնական լարվածություն է, որը ՊՊԾ գնդի գրավման տարեդարձին լավ կանխատեսումների առիթ չի տալիս:
