Մաքսային միությանն անդամակցելու Հայաստանի սեպտեմբերի 3-ին կայացրած որոշումն անակնկալ էր: Այսօր «Անի Պլազա» հյուրանոցի «Անի» սրահում հրավիրված «Եվրոպան ճամպրուկի մեջ» քննարկման ընթացքում հայտարարեց ԵՄ-ի հայաստանյան պատվիրակության ղեկավար Տրայան Հրիսթեան:
«Անակնկալի պատճառն այն է, որ Հայաստանը ԵՄ-ի հետ Ասոցացման համաձայնագիր ստորագրելու ուղղությամբ տարել և արդեն ավարտել էր բանակցությունները: Ակնկալվում էր, որ Վիլնյուսում Հայաստանը կնախաստորագրի: Բացի այդ, Հայաստանի իշխանությունների տարբեր ներկայացուցիչներ բազմիցս նշել են, որ Հայաստանը նպատակ չունի միանալ Մաքսային միությանը, որովհետև ընդհանուր սահման չունի և այլն:
Հրիսթեան նշեց, որ Ասոցացման համաձայնագիրը ոչ միայն քաղաքական համագործակցություն էր, այլ նաև տնտեսական, և դրանք տարանջատել պետք չէ. «Այն տալիս էր քաղաքական և տնտեսական բարեփոխումների համար գործիքներ: Մենք մասնակցում էինք մի գործընթացի, որը բերում էր Լիսաբոնից մինչև Վլադիվոստոկ ազատ առևտրին»:
Նա հավելեց, որ անհրաժեշտ է վերանայել բոլոր ծրագրերը, մասնավորեցնել նրանք, որ կապված են ԽՀԱԱՊ-ի հետ և տեսնել, թե համագործակցության ինչ նոր եզրեր են հնարավոր: «Մենք շարունակելու ենք համագործակցությունը, մասնավորապես՝ ժողովրդավարության արդյունավետ վերհսկողության, կոռուպցիայի դեմ պայքարի և այլ ոլորտներում: Կարևոր է նաև համագործակցությունը քաղաքացիական հասարակության հետ: Մեր մոտեցումները հստակ, թափանցիկ և կանխատեսելի են: Մենք աշխատելու ենք այս ձևով, որպեսզի պատրաստվենք Վիլնյուսի գագաթնաժողովին: Իսկ թե ինչ հնարավորություն կա համագործակցության` կլսենք մեր հայաստանյան գործընկերներից»,- եզրափակեց նա:
