IHS ընկերության վերլուծաբանները ներկայացրել են տվյալներ նոր iPhone 5S-ի 16 գբ մոդելի դետալների արժեքի մասին: Մասնագետների հաշվարկներով՝ այդ սարքի արժեքը կազմում է 199 դոլար, մինչդեռ 64 գբ մոդելն արժե 218 դոլար:
Հաշվարկվել է նաև 8 դոլար գումարը, որը ծախսվել է չինական գործարանում մեկ iPhone-ի հավաքման համար:
Բացի այդ, վերլուծաբաններն ուսումնասիրել են iPhone 5C բյուջետային մոդելի ինքնարժեքը: Պարզվել է, որ այդ մոդելի պահեստամասերի արժեքը կազմում է 173-183 դոլար՝ կախված հիշողության մեծությունից: Այդ սարքի հավաքումը գնահատվել է 7 դոլար:
IHS-ի տվյալներով՝ երկու սարքերի ամենաթանկ դետալները հանդիսանում են դրանց դիսփլեյները: 5S-ի դիսփլեյն արժե 41 դոլար:
Առանց օպերատորի հետ պայմանագրի՝ արևմտյան շուկաներում iPhone 5S-ն արժե 649-849 դոլար, իսկ iPhone 5C-ն՝ 549-649 դոլար:
Հիշեցնենք, որ երկուշաբթի Apple-ը հայտնել է 9 մլն նոր մոդելների սմարթֆոնների վաճառքի մասին:
