Ի՞նչ կարևորություն ունի Թուրքիայի համար իր ռազմական ներկայությունը Կատարում՝ հատկապես Պարսից ծոցի արաբական միապետությունների հարաբերություններում առաջացած ճգնաժամի համատեքստում: Ընդհանրապես սա ռազմավարական ի՞նչ նպատակներ է հետապնդում:
Պատասխանելով «Առաջին լրատվական»-ի այս հարցին՝ Բրյուսելի «Եվրոպական քաղաքականության կենտրոնի» քաղաքական վերլուծաբան, Թուրքիայի քաղաքական հարցերի փորձագետ Ամանդա Փոլը պարզաբանեց, որ Թուրքիան ու Կատարը սերտ հարաբերություններ ունեցող երկրներ են, դավանում են միևնույն գաղափարախոսությունը և մասնավորապես ունեն շատ կարևոր ֆինանսական կապեր:
«Այս երկու պետությունները «Մուսուլման եղբայրների» և օրինակ՝ «Համասի» ամենամեծ աջակիցներն են: Անկարայի այս մոտեցումը քաղաքական այն գծի մեջ է, որը նա որդեգրել է վերջին տարիներին Կատարի նկատմամբ, թեև սա պարունակում է որոշակի ռիսկեր՝ խորացնելու Թուրքիայի մեկուսացումը տարածաշրջանում»,- մեկնաբանեց փորձագետը:
Սաուդյան Արաբիան, Արաբական Միացյալ Էմիությունները (ԱՄԷ), Բահրեյնը և Եգիպտոսը, որոնք մի քանի այլ արաբական երկրների հետ միասին ամսվա սկզբին խզել էին դիվանագիտական հարաբերությունները Կատարի հետ, 13 կետանոց պահանջագիր են ներկայացրել այս պետությանը, որի կատարման դեպքում միայն պատրաստ են վերականգնել հարաբերությունները Կատարի հետ: Այդ կետերից մեկը հենց Թուրքիա-Կատար ռազմական համագործակցության մասին է: Սաուդցիների գլխավորած կոալիցիան կատարցիներից պահանջում է փակել թուրքական ռազմաբազան Կատարում, որը ներկայումս շինարարության փուլում է, և դադարեցնել թուրքական կողմի հետ ռազմական համագործակցությունը:
Մեկնաբանելով Կատարին ներկայացված պահանջները՝ Թուրքիայի նախագահ Ռեջեփ Թայիփ Էրդողանը հայտարարել է, որ դա անհարգալից վերաբերմունք է առաջին հերթին Թուրքիայի հանդեպ: