Մայր Աթոռում մեկնարկած եպիսկոպոսաց ժողովին ներկա Արարատյան հայրապետական թեմի առաջնորդ Նավասարդ արքեպիսկոպոս Կճոյանին «Առաջին լրատվական»-ը մի քանի հարց ուղղեց ժողովի, ինչպես նաև օֆշորային սկանդալի վերաբերյալ:
– Սրբազան, ի՞նչ խորհուրդ ունի օրը, 600 տարվա դադարից հետո վերսկսվող ժողովը իրո՞ք հնարավորություն կընձեռի՝ քայլեր մշակելու եկեղեցական խնդիրների լուծման ուղղությամբ:
– Սիրանույշ ջան, ավելի լավ կլինի ատենապետներին հարցնեք՝ Խաժակ և Օշական սրբազաններին:
– Ձեր կարծիքն է հետաքրքրում:
– Բոլորիս կարծիքն էլ մեկն է՝ աննախընթաց երևույթ է, և սպասելիքները շատ են:
– Այսօր Արամ Ա կաթողիկոսը խոսում է եկեղեցու խնդիրներից, ասում, որ եկեղեցին թանգարան չէ:
– Ով բարձրացրել է՝ իրեն հարցրեք…
– Իսկ Ձեր կարծիքը…
– Իմ կարծիքը ժողովին մասնակցելն է:
– Վերջին խնդիրները՝ կապված Ֆրանսիայի հայոց թեմի առաջնորդի, ինչպես նաև Երուսաղեմի հայոց պատրիարքի հետ, ինչպե՞ս կմեկնաբանեք:
– Մայր Աթոռի դիվանը տարածել է հաղորդագրություն:
– Այսինքն՝ կիսո՞ւմ եք Մայր Աթոռի կարծիքը:
– Միանշանակ, երկրորդ կարծիք չկա, և չեմ կարող ունենալ:
– Սրբազան, օֆշորային սկանդալի հետ կապված այդպես էլ որևէ հիմնավորում չեղավ:
– Ես պատասխանել եմ այդ հարցին:
– Ինչո՞ւ չեք հիմնավորում:
– Ինչ կա հիմնավորելու, մեղադրանք կա՞, որպեսզի հիմնավորում լինի, մեղադրանք կա՞, որպեսզի հիմնավորում լինի…
Վերջում երկու անգամ կրկնելով միևնույն միտքը՝ Արարատյան հայրապետական թեմի առաջնորդ Նավասարդ արքեպիսկոպոս Կճոյանը զայրացած հեռացավ:
