Այն բանից հետո, երբ Լիտվայում բռնաբարել ու սպանել էին 17-ամյա մի աշակերտուհու, երկրում բարձրացվել է մահապատժի վերադարձման պահանջ: Delfi.lt-ի փոխանցմամբ՝ նման պահանջով է հանդես եկել սեյմի պատգամավոր, «Կարգուկանոն և արդարություն» խմբակցության առաջնորդ Պյատրաս Գրաժուլիսը:
Խորհրդարանականն արդեն գրանցել է համապատասխան ուղղումները: Բացատրական թերթիկում նա նշել է, ոչ քրեածին իրավիճակն ու հանցագործների հանդգնությունը դառնում են անկառավարելի, հասարակությունն իրեն զգում է ոչ անվտանգ, այդ իսկ պատճառով մահապատժի վերադարձն անվտանգության զգացումը վերստեղծելու միջոցառումներից մեկն է:
Նա հղում է արել նաև վերջերս Spinter tyrimai ընկերության անցկացրած սոցիոլոգիական հետազոտությանը: Արդյունքները ցույց են տվել, որ մահապատժի վերադարձման գաղափարին աջակցում է բնակիչների մոտ կեսը:
Անցած շաբաթ տեղի ունեցած հանցագործության ենթադրյալ մեղավորներ նախկինում դատված մի քանի երիտասարդներ են: Նախնական վարկածով՝ նրանք դպրոցականին առևանգել էին, բռնաբարել, այնուհետև սպանել, դիակը թողել մեքենայում ու հրդեհել այն:
Երկու կասկածյալներն արդեն ձերբակալված են:
Դեպքի հետ կապված՝ բարձրացվել է նաև 112 ծառայության աշխատանքի արդյունավետության հարցը: Աղջիկը մեքենայի թափքում գտնվելով՝ մի քանի անգամ զանգահարել է նրանց, ներկայացրել իրավիճակը, սակայն ծառայության աշխատակիցները անհրաժեշտ միջոցառումներ չեն ձեռնարկել նրա տեղը պարզելու համար:
Մահապատիժը Լիտվայում վերացվել է 1998 թվականից: Այդ պատժամիջոցից հրաժարվելը եղել է Եվրամիությանը անդամագրվելու պայմաններից մեկը:
