Հայաստանի և Ադրբեջանի արտաքին գործերի նախարարների առաջիկա հանդիպումը Ավստրիայում տեղի է ունենալու ԵԱՀԿ Մինսկի խմբի համանախագահների միջնորդությամբ, բայց քանի որ գագաթնաժողովի մակարդակով անցկացվող նման հանդիպումները փակ են՝ լինի նախարարների, թե նախագահների հանդիպում, դժվար է նույնիսկ ենթադրել, թե ինչ փաստաթուղթ կարող է դրված լինել բանակցային սեղանին: «Առաջին լրատվական»-ի հետ զրույցում այսպիսի կարծիք հայտնեց Մերձավոր Արևելքի և Կովկասի հարցերի փորձագետ Ստանիսլավ Տարասովը:
Հիշեցնենք, որ ռուսական «Ռիա նովոստի» լրատվական գործակալությունը, հղում անելով դիվանագիտական շրջանակների աղբյուրին, գրել էր, թե նախարարներ Նալբանդյանի և Մամեդյարովի հանդիպումը կայանալու է հուլիսի 11-ին, Ավստրիայի Մաուերբախ քաղաքում: Նախարարներին առաջարկել են հանդիպել ԵԱՀԿ ԱԳՆ ղեկավարների ոչ պաշտոնական հանդիպման շրջանակներում: Ակնկալվում է, որ Մինսկի խմբի համանախագահները ևս կմասնակցեն Նալբանդյան-Մամեդյարով հանդիպմանը:
Այդուհանդերձ, փորձագետ Տարասովը կարծում է, որ հանդիպման փաստն ինքնին նշանակում է, որ Հայաստանի և Ադրբեջանի արտգործնախարարներն ունեն քննարկելու թեմաներ: Ինչ վերաբերում է բանակցային գործընթացին, ապա այն, մեր զրուցակցի համոզմամբ, մտել է փակուղի, և ելքը այս իրավիճակից, առաջին հերթին, բանակցային ձևաչափը փոխելն է, երկրորդը՝ արցախյան կողմին՝ պաշտոնական Ստեփանակերտին, բանակցություններին լիարժեք մասնակից դարձնելը:
«Գործընթացը այս ձևաչափով մտել է փակուղի, անհրաժեշտ է ինչ-որ առաջընթաց, իսկ ժամանակի ձգձգումը մարտավարական և ռազմավարական առումով ձեռնտու է Հայաստանին, քանի որ դա թույլ է տալիս ամրապնդել Ղարաբաղի պետականությունը, իսկ Հայաստանը մանևրելու հնարավորություն է ստանում: Իրադարձությունները այնպես չեն զարգանում, ինչպես կուզեր Ադրբեջանը: Ելքը տվյալ իրավիճակից հնարավոր է հետևյալ կերպ. նախ՝ անհրաժեշտ է փոխել բանակցությունների ձևաչափը, երկրորդ՝ Ստեփանակերտը պիտի միանա բանակցություններին:
Սա կոնֆլիկտաբանություն է, հասկանում եք: Այն ունի իր օրենքները: Այն ժամանակ Հայաստանի երկրորդ նախագահն այնպես արեց, որ Ստեփանակերտը դուրս գա բանակցություններից, իսկ Բաքուն ընդունեց այդ ձևաչափը, բայց հիմա պարզ է, որ դա սխալ էր: Երևանը սխալվեց, Բաքուն նույնպես: Ստեփանակերտի հետ բանակցելը հիմա պետք է Բաքվին դիվանագիտական մանևրի հնարավորությունները վերականգնելու համար: Հայաստանին դա պետք է հենման կետ ունենալու և, ի վերջո, բանակցությունները սկսելու և փոխզիջումային լուծում գտնելու նպատակով:
Փոխզիջումային լուծումը, ըստ երևույթին, կապված է տարածքային հարցերի հետ: Ամենայն հավանականությամբ, դա անխուսափելի է, բայց ինչ տարբերակ կառաջարկվի այդ հարցը լուծելու համար՝ դժվար է ասել, որովհետև Ստեփանակերտը ցանկանում է ապահովել իր անվտանգությունը ռազմավարական մակարդակով:
Ամեն դեպքում, ներկայիս դասավորության պայմաններում Ադրբեջանը պարտվել է, կորցրել է Ղարաբաղը: Նա կարող է փոխել այս իրավիճակը միայն աշխարհաքաղաքական միջավայրը փոխելու միջոցով: Բայց Մոսկվան և Վաշինգտոնը սպասողական դիրք են գրավել: Նրանք փորձում են սառեցնել կոնֆլիկտը, թույլ չտալ, որպեսզի բռնության նոր ալիք բարձրանա, քանի որ շատ բարդ վիճակ է հարավում՝ Մերձավոր Արևելքում: Մարտական գործողությունները այդ տարածաշրջանում տեղի են ունենում Հայաստանի և Ադրբեջանի սահմանից ընդամենը 200 կմ հեռավորության վրա»,- մեկնաբանեց Ստանիսլավ Տարասովը: