Ռուսաստանի վարչապետ Դմիտրի Մեդվեդևը Գերմանիայի դաշնային կանցլեր Հելմուտ Քոլի վերջին հրաժեշտի արարողության ժամանակ հայտարարել է, որ Եվրոպայում առկա հակասությունները չեն մոտեցնում «մեկ տանիքի» ստեղծման նպատակին:
Նա համաշխարհային առաջնորդներին հորդորել է շարժվել դեպի այդ նպատակը:
«Պետք է ընդունել, որ այսօր մեր հակասությունների պատճառով բավականին հեռու ենք մեկ ընդհանուր տանիք ստեղծելու մեր երազանքից»,- նշել է ՌԴ վարչապետը:
Դմիտրի Մեդվեդևի համոզմամբ՝ նրանց ընդհանուր նպատակը պետք է լինի հենց միասնական, անվտանգ և բարգավաճ Եվրոպան:
«Հելմուտ Կոլը ավելի դժվարին ժամանակներում ապացուցել է, որ այդ նպատակը հասանելի է: Նրա ջանքերի արժանի հետևորդ լինելու պատասխանատվությունն է այժմյան համաշխարհային առաջնորդների ուսերին: Հելմուտ Կոլը երազում էր ոչ միայն միասնական Գերմանիայի, այլև միասնական Եվրոպայի մասին, և տեսնում էր Ռուսաստանը որպես դրա անբաժան մաս»,- ասել է նա:
