Հայաստանի Հանրապետության նախագահ Սերժ Սարգսյանը ՀԱՊԿ անդամ երկրներից աջակցություն է խնդրել՝ Շանհայյան համագործակցության կազմակերպությունում դիտորդի կարգավիճակ ստանալու համար:
Ինչպես հաղորդում է ITAR-TASS-ը, Սարգսյանը հաստատել է պետության հետաքրքրվածությունը կազմակերպության գործունեությամբ, որը, նախագահի գնահատմամբ, կարևոր ներդրում է կատարում տարածաշրջանում անվտանգության ապահովման գործում:
«Հույս ունեմ ստանալ ձեր աջակցությունն այդ հարցում»,- ասել է նա՝ դիմելով պետությունների ղեկավարներին, որոնք (Ռուսաստան, Ղրղզստան, Ղազախստան և Տաջիկստան) անդամակցում են և՛ ՀԱՊԿ-ին, և ՇՀԿ-ին:
Շանհայյան համագործակցության կազմակերպությանն անդամակցում են Ռուսաստանը, Ղրղզստանը, Ղազախստանը, Տաջիկստանը, Չինաստանը և Ուզբեկստանը: Կազմակերպության դիտորդ երկրների թվին են պատկանում Աֆղանստանը, Իրանը, Մոնղոլիան, Հնդկաստանը և Պակիստանը:
