Մայիսի 29-ին Թբիլիսիի ս. Գևորգ եկեղեցու հարևանությամբ գտնվող պատմական Մեյդան հրապարակում տեղի է ունեցել մայիսյան ավանդական Սայաթնովյան վարդատոնը: Տոնին ներկա են եղել հյուրեր Հայաստանից, Արցախից և Վրաստանի տարբեր անկյուններից:
Հավաքվածներին տոնի առթիվ շնորհավորեց Վրաստանում Հայաստանի դեսպան Հովհաննես Մանուկյանը: Նա մասնավորապես ասաց. «Սա մեր փոքրիկ պարտականությունն է այն մեծ ստեղծագործողի առջև, որի անունն է Սայաթ-Նովա: Այն ժառանգությունը, որը մեր մշակույթին տվել է Սայաթ-Նովան, անգնահատելի է: Թերևս չկա մի հայ մարդ, մի հայ մանուկ, որի կյանքը և որպես անհատ ձևավորման պրոցեսը անցած չլինի Սայաթ-Նովայի հնչյունների ներքո: Սակայն ամեն տարի այս տոնը նշելիս ամեն մեկս պետք է մի պահ մտածենք, թե արդյոք մենք ամեն ինչ արել ենք, որպեսզի արժանվույն գնահատենք Սայաթ-Նովայի արվեստը, աշխարհին իսկապես մատուցենք այն մեծ ժառանգությունը, որը թողել է նա մեզ»:
Սայաթ-Նովայի ստեղծագործական ժառանգության մասին ելույթներ ունեցան նաև Հայաստանյայց Սուրբ Եկեղեցու Վիրահայոց թեմի առաջնորդ, Տ. Վազգեն եպիսկոպոս Միրզախանյանը, Վրաստանի նախագահի` ազգային փոքրամասնությունների գծով խորհրդական Վան Բայբուրդը և Երևանից ժամանած հյուրեր, նաև ընթերցվեց ողջույնի ուղերձ` Հայաստանի գրողների միության անունից:
Տոնի կապակցությամբ կայացած համերգում հանդես եկան Երևանից ժամանած «Սայաթ-Նովա» համույթը՝ Թովմաս Պողոսյանի ղեկավարությամբ, Թբիլիսիի «Ջեյրան» պարային համույթը՝ Սվետլանա Երիցյանի ղեկավարությամբ, Թբիլիսիի պետական հայկական դրամատիկական թատրոնի դերասաններ, մենակատարներ Հենրիխ Պողոսյանը, Անա Խանչալյանը, Անահիտ Հարությունյանը և ուրիշներ:
