Ինտերնետում հեռախոսակապ տրամադրող ամենահայտնի ծառայությունը՝ Skype-ը, որի ծառայություններից օգտվում են նաև աշխարհի այլախոհները, քանի որ կարծիք կար, որ այն անհասանելի է հատուկ ծառայությունների համար, պարզվում է, այդպիսին չէ: Այս մասին գրում է The Wall Street Journal-ը:
Այս ծառայությունը շատ հայտնի էր Եգիպտոսում, որտեղ տեղի էին ունենում հեղափոխական իրադարձություններ, իսկ Skype թույլ էր տալիս օպերատիվ կապ ապահովել և մնալ անհասանելի հատուկ ծառայությունների համար:
Սակայն The Wall Street Journal-ը պարզել է, որ հատուկ ծառայություններին հաջողվել է կոտրել կոդերը, որոնցով տեղեկություններ է տարածվում այս ծառայության միջոցով: Այն մշակվել է շվեդ Նիկոլաս Զենստրեմի և դանիացի Յանուս Ֆրիիսի կողմից: Բացահայտված խոսակցություններից մեկում եգիպտացի երկու երիտասարդներ խոսում են Skype-ի ապահովության մասին:
Այս փաստը բացահայտվել է այն ժամանակ, երբ երիտասարդներն այս տարվա մարտին ներխուժել են Եգիպտոսի հատուկ ծառայություններից մեկի գրասենյակ և դարակներից մեկում հայտնաբերել հենց իրենց խոսակցության վերծանումները, որտեղ քննարկվել էր վերոնշյալ խնդիրը: «Ես գիտեմ, որ նրանք վերցրել են բոլոր մանրուքները, որ մեր շուրթերից էին դուրս գալիս, և հավաքել դրանք մեկ թղթապանակի մեջ»,- ասել է թերթի զրուցակիցը:
Ինտերնետ ծառայության անվտանգության բաժնի ղեկավար Ադրիան Աշերն ասել է, որ ընկերությունը չի կարող կանխել կոդերը կոտրելու բոլոր ծրագրերը, որոնք վարկաբեկում են Skype-ը:
Թերթը նշում է, որ Skype-ի թույլ տեղերն ավելանում են: Եթե նախկինում հատուկ ծառայությունները գտել էին խոսկցությունները վերծանելու կոդերը, ապա հիմա նրանք կարողանում պարզել նաև կոնտակների ցուցակում եղած մարդկանց: Այս մասին են վկայում Լիբիայի ապստամբները:
