Գերմանիայի պահպանողական դաշինքը, որի կազմում ներառված են Քրիստոնեա-դեմոկրատական միությունն ու Քրիստոնեա-սոցիալական միությունը, կիրակի անցկացված համընդհանուր խորհրդարանական ընտրություններում համոզիչ հաղթանակ է տարել: Այնուհանդերձ, կանցլեր Անգելա Մերկելին չի հաջողվել բացարձակ մեծամասնության հասնել, ինչը նշանակում է, որ անհրաժեշտ է այլ ուժերի հետ կոալիցիա ձևավորել:
Նախնական տվյալներով՝ դաշինքը հավաքել է 41.5 տոկոս ձայն՝ համամասնական ցուցակներով, և 45.3 տոկոս՝ միամանդատ շրջաններում: Այս մասին հայտնում է France-Presse գործակալությունը: Երկրորդ տեղը զբաղեցրել է ձախակենտրոն «Գերմանիայի սոցիալ-դեմոկրատական կուսակցությունը»՝ ստանալով ընտրողների 25.7 տոկոսի աջակցությունը:
Իշխող կոալիցիայի կազմի մեջ մտնող «Ազատ դեմոկրատական կուսակցությունը» պատմական պարտություն է կրել՝ ստանալով ընդամենը 4.8 տոկոս ձայն: Այն չի կարողացել հաղթահարել 5 տոկոսի շեմը և չի ներկայացվի 18-րդ գումարման Բունդեսթագում: «Այլընտրանք Գերմանիայի համար» նոր կուսակցությունը հավաքել է 4.7 տոկոս ձայն և կրկին դուրս կմնա Բունդեսթագից:
Խորհրդարան կմտնեն նաև «Ձախերն» ու «Կանաչները», որոնք հավաքել են համապատասխանաբար 8.6 և 8.4 տոկոս ձայն:
Անգելա Մերկելի դաշինքը «Գերմանիայի սոցիալ-դեմոկրատական կուսակցության» հետ կառավարական մակարդակով աշխատանքի փորձ ունի: Կանցլերի գլխավորությամբ «Մեծ կոալիցիան» գործել է 2005-2009 թվականներին: Առավել հավանական է համարվում կոալիցիան դաշինքի և հենց այդ կուսակցության կազմով:
Ավելի վաղ Քրիստոնեա-սոցիալական միությունը բացառել էր «Կանաչների» հետ կոալիցիա կազմելու հնարավորությունը:
Ընտրողների մասնակցությունը կազմել է 73 տոկոս, նախորդ ընտրություններին ցուցանիշը կազմել էր 70.8 տոկոս:
