Ազգային ժողովում «Հայաստանի Հանրապետության 2016թ. պետական բյուջեի կատարման մասին» տարեկան հաշվետվության ժամանակ «Ծառուկյան» խմբակցության պատգամավոր Վարդան Բոստանջյանը նշեց, որ որևէ մի հարկաբյուջետային և դրամավարկային լծակ չի կարող արդյունավետ աշխատել. այն կարող է ընդամենը կարճաժամկետ, իրավիճակային դրական ազդեցություն ունենալ: Պատգամավորի խոսքով՝ մենք նորից կարող ենք կախված մնալ տրանսֆերտներից ու միջազգային կառույցներից:
Ի պատասխան՝ ՀՀ ֆինանսների նախարար Վարդան Արամյանն ասաց. «Էնպես չի, որ դու չունես այդ կառավարման մոդելը, և քեզ վստահում և գումարներ են տալիս 30 տարով»՝ հավելելով, որ իրենք ունեն պարտքի կառավարման լավ գործիքակազմ:
Նախարարի խոսքով՝ այսօր հնարավոր չէ հավակնել 7-8 տոկոս տնտեսական աճի, քանզի ամբողջ աշխարհն է գտնվում հարաբերականորեն ավելի ցածր տնտեսական աճի ցիկլում:
Անդրադառնալով կենսաթոշակների հարցին՝ Արամյանն ասաց. «Գլխավոր գաղափարախոսությունն այն է, որ բոլոր ձվերը մեկ զամբյուղի մեջ պետք չէ դրվեն: Կարևոր մեխերից մեկն այն է, որ մենք հետագայում ունենանք փոխհատուցման բարձր գործակից»: