Սպիտակ տունը մտադիր չէ հրաժարվել առողջապահության ոլորտի բարեփոխումից՝ չնայած հանրապետական կոնգրեսականների սպառնալիքներին՝ դադարեցնել իշխանության դաշնային մարմինների աշխատանքի ֆինանսավորումը, հայտարարել է ԱՄՆ նախագահ Բարաք Օբաման:
Ուրբաթ օրը Կոնգրեսի ներկայացուցիչների պալատը, որը ղեկավարում են հանրապետականները, օրինագիծ է ընդունել, որն ապահովում է պետհաստատությունների ֆինանսավորումը՝ սկսած նոր ֆինանսական տարուց (հոկտեմբերի 1) մինչև դեկտեմբերի 15-ը, սակայն նախատեսում է հրաժարվել առողջապահության բարեփոխումը ֆինանսավորելուց: Այդ բարեփոխումն Օբամայի ամենահիմնական նախաձեռնություններից է, հայտնում է Ria Novosti-ն:
Ավելի վաղ Սպիտակ տունը հայտարարել էր, որ երկրի ղեկավարը մտադիր է վետո դնել այդ բանաձի վրա: «Նրանք սպառնում են դադարեցնել կառավարության աշխատանքի ֆինանսավորումը, եթե մենք չեղյալ չհամարենք առողջապահության մասին օրինագիծը: Թույլ տվեք պարզաբանեմ իրավիճակը. դա տեղի չի ունենա»,- ասել է նախագահը:
Օբամայի կարծիքով՝ իր հակառակորդ հանրապետականները փորձում են կառավարել «ճգնաժամի միջոցով»: «Նրանք հերքում են միլիոնավոր ամերիկացիների համար կենսական անհրաժեշտությունը: Սա մտորելու հետաքրքիր թեմա է: Մեր հիմնական օրակարգը կապված է այն բանի հետ, որ 20 մլն մարդ չունի բժշկական ապահովագրություն: Իսկ նրանք պատրաստ են կառավարության աշխատանքի խոչընդոտմանը, և հնարավոր է դիֆոլտ՝ առաջինն ԱՄՆ-ի պատմության մեջ»,- ասել է նախագահը:
