Սերժ Սարգսյանը սխալ է արել և վերջ. Պարույր Հայրիկյան (տեսանյութ)

Ինչպես ավելի վաղ տեղեկացրել էինք, երեկ Ազատության հրապարակում «Ժառանգության» առաջնորդ Րաֆֆի Հովհաննիսյանն ու ԱԻՄ առաջնորդ Պարույր Հայրիկյանը համատեղ հանրահավաք անցկացրին՝ նվիրված Անկախության 22-րդ տարեդարձին:

Հանրահավաքից հետո «Առաջին լրատվական»-ը մի քանի հարց ուղղեց Պարույր Հայրիկյանին:

Անդրադառնալով Մաքսային միությանն ուղված պայքարին՝ Հայրիկյանը նշեց, որ այդ հարցում պետք է համակարծիք ուժեր համախմբվեն․«Քանի որ ամեն կազմակերպություն ունի իր կառույցը՝ ըստ այդ կառույցների նմանօրինակ համախմբում հնարավոր է կայանա»:

Մեր այն դիտարկմաը, թե կուսակցություններից միայն «ժառանգությունն» է հստակ դեմ արտահայտվել Մաքսային միությանը, իսկ «Հանրապետություն»-ը՝ ըննդեմ Մաքսային միության պայքարի կոչով հանդես եկել, ԱԻՄ առաջնորդն ասաց․«Կոչով հանդես գալուց բացի պետք է բոլորը գործնական քայլեր կատարեն, մամուլում տեսակետ հայտնելուց բացի և տեսնենք՝ ով ինչ կկատարի՝ ըստ այդմ էլ կկողմնորոշվենք»:

Խոսելով այն տեսակետների մասին, որ Երրորդ հանրապետության վախճանը մոտենում է, և այն մասին, որ սա շատ նման է Առաջին հանրապետության վախճանին, Հայրիկյանն ասաց․«Այն ժամանակ աշխարհաքաղաքական փոփոխություններ էին տեղի ունենում, որոնք այս պահին բարեբախտաբար չկան, եթե այդ փոփոխությունները չլինեին, մեր Առաջին հանրապետությունը սերունդների համար շատ ավելի լավ ժառանգություն կթողներ»:

Այն հարցին, արդյոք անդամագրվելով Մաքսային միությանը՝ Հայաստանը կկորցնի՞ իր անկախությունը, մեր զրուցակիցը պատասխանեց․«Քանի որ Հայաստանն իր միջազգայնորեն ճանաչված տարածքների, Արցախի հետ միասին հազիվ 20 տոկոսի վրա է իշխում, նշանակում է խոսքը տարածքներին չի վերաբերում, որևէ տեսակի անկախ Հայաստան կմնա: Այսինքն՝ խոսքը ոչ թե անկախությանն է վերաբերում, այլ մեր ազգային անվտանգությանը՝ մենք պետք է խոսենք մեր ազգային անվտանգությանը սպառնացող վտանգի մասին, իսկ այսօր այդպիսի վտանգներ կան»:

Դիտարկմանը, թե շատերը Սերժ Սարգսյանի այս հայտարարությունը հիմնավորում են նրանով, որ հաշվի է առնվել Ղարաբաղի ու Հայաստանի անվտանգությունը, մեր զրուցակիցն արձագանքեց․« Յուրաքանչյուր հանցագործ իր բացատրություններն է տալիս… Երբ որևէ մեկի շարժառիթներին է վերաբերում, ամենաճիշտն այդ մարդուն լսելն է, եթե նա կենդանի է։ Ես չեմ էլ խորանում թե Սերժ Սարգսյանն ինչու է արել այդ սխալը՝ դա սխալ է և վերջ»:

Հարցին՝ կա՞ արդյոք ետդարձի ճանապարհ, ԱԻՄ առաջնորդն ասաց․«Թող առաջ գնալու մասին մտածեն, թե ինչպես են հանձնաժողովներում, խորհրդարանում անցկացնելու, դեռ պետք է Սահմանդրական դատարանը հաստատի»:

Դիտե՛ք մեր տեսանյութը