«Էյր Արմենիա» ավիաընկերության հիմնադիր Վահան Հարությունյանը «Առաջին լրատվական»-ի հետ զրույցում հայտնեց, որ իրենք մերժել են ընդունել այն օդանավը, որ պետք է վերցնեին արտասահմանյան ինչ-որ ընկերությունից՝ Հայաստանից թռիչքներ իրականացնելու համար:
Հիշեցնենք, որ ապրիլի 1-ից «Արմավիա» ընկերության սնանկացումից ու ավիաշուկայից դուրս մղվելուց հետո ՀՀ կառավարությունը հայտարարեց, որ ազատականացնում է ավիաշուկան, և որ պետք է գործեն առնվազն երեք հայկական ավիաընկերություններ: Մի քանի ամիս առաջ թռիչքներ իրականացնելու լիցենզիա ստացավ միայն «Էյր Արմենիա» ընկերությունը, որի հիմնադիր Վ. Հարությունյանը հանրապետական պատգամավոր Դավիթ Հարությունյանի եղբայրն է: «Էյր Արմենիան» թեև շատ տարիներ առաջ է հիմնադրվել, սակայն մինչ այժմ միայն բեռնափոխադրումներ էր իրականացնում: Այս անգամ ընկերությանը տրվեց դեպի Ռուսաստան վեց եկամտաբեր ուղղություններով՝ դեպի Մոսկվա, Սանկտ Պետերբուրգ, Սոչի, Ռոստով, Կրասնոդար և Սամարա թռիչքներ իրականացնելու թույլտվություն:
Այնուհետև տեղեկություններ հրապարակվեցին, թե ընկերությունը թռիչքները կիրականացնի օգոստոս ամսվա ընթացքում, սակայն դա այդպես էլ տեղի չունեցավ: Վ. Հարությունյանը «Առաջին լրատվական»-ի հետ զրույցում մոտ մեկ ամիս առաջ հայտնել էր, որ լիզինգով մի օդանավ են վերցնելու, և որ լիզինգատուն այն այժմ իրենց օդանավը պատրաստում է իրենց պահանջներին համապատասխան: Այդ ժամանակ խոսքը ընդամենը օդանավի վրա ընկերության լոգոն պատկերելու մասին էր: Վ. Հարությունյանը նաև ասել էր, որ ինքնաթիռների վերանորոգման եվրոպական մի ընկերությունում օդանավն անցնում է համապատասխան պատրաստում, և իրենք աշխատում են հնարավորինս շուտ թռիչք իրականացնել:
Սակայն այսօր Վ. Հարությունյանը մեզ հետ զրույցում հայտնեց, որ տվյալ օդանավի տեխնիկական զննության արդյունքները չէին համապատասխանում «Էյր Արմենիայի» պահանջներին, և իրենք հրաժարվել են ընդունել այն: Նա չկոնկրետացրեց, թե խոսքը իրենց որ պահանջներին կամ օդանավի որ թերություններին է վերաբերում՝ վերաբերում է իրենց և լիզինգատուի հարաբերությունների՞ն: Որքանով հասկանալի էր նրա խոսքերից, լիզինգատու ընկերությունը փաստաթղթերով ավելի լավ վիճակ է ներկայացրել, բայց տեխնիկական զննումից հետո ավելի վատ վիճակ է հայտնաբերվել: Նա ընդամենը հայտնեց, որ իրենք այժմ աշխատում են մեկ այլ ընկերությունից նոր օդանավ ձեռք բերելու ուղղությամբ՝ այն դեպքում, երբ մեկ ամիս առաջ նա խոսում էր երկրորդ օդանավը ձեռք բերելու մասին:
Շրջանառվող տեղեկությունների համաձայն, սակայն, լիզինգատու ընկերությունը «Էյր Արմենիայից» պահանջել է միանգամից վճարել 1 տարվա լիզինգային վճարը, ինչը մի քանի մլն դոլար է կազմել: Բացի այդ, իսկապես, օդանավը չի եղել բավարար թարմ վիճակում: Հայկական ընկերությունն այն վերցնում էր վիետնամական ինչ-որ ընկերությունից, որն էլ առաջարկել է բավականին մաշված և հին օդանավ, այդ պատճառով էլ ի վերջո «Էյր Արմենիան» հրաժարվել է: Վ. Հարությունյանը չցանկացավ հերքել կամ հաստատել այս լուրերը՝ կրկնելով, որ լիզինգատուի հետ ունեցել են գործարքի գաղտնիությունը պահպանելու պայմանավորվածություն: Նա ընդամենը ավելացրեց, որ օդանավ ձեռք բերելն ու թռիչքներ իրականացնելը բավականին բարդ ու երկարատև գործընթացներ են, և որ իրենք անում են ամեն ինչ՝ այն հնարավորինս շուտ ավարտելու համար:
Ի դեպ, Վ. Հարությունյանը մեզ հետ զրույցում նշեց, որ տվյալ պարագայում Հայաստանի նկատմամբ պահանջներն ավելի խիստ են եղել, քան ընդունված է միջազգային ավիաշուկայում: Արդյոք այդ վերաբերմունքի պատճառը «Արմավիա» ընկերության բացասական ազդեցությո՞ւնն է ավիաշուկայում Հայաստանի՝ որպես հուսալի գործընկերոջ վարքի վրա. չէ՞ որ «Արմավիան» գործունեությունը դադարեցրեց սնանկացման միջոցով և ուներ միլիոնավոր դոլարի պարտքեր թե՛ Հայաստանում, թե՛ արտասահմանյան ավիաընկերությունում: Եվ միգուցե «Արմավիայի» նման վարքագիծը բավականին բացասաբար է ազդել ավիաշուկայում Հայաստանի վարկանիշի, ինչպես նաև «Էյր Արմենիայի» գործունեության վրա:
Այնուամենայնիվ, «Էյր Արմենիայի» գործունեության դանդաղեցումը բավականին բացասական հետևանքներ կունենա թե՛ այդ, թե՛ առաջիկայում այլ ընկերությունների աշխատանքների վրա: Բանն այն է, որ երբ ապրիլի 1-ից հետո հայտարարվեց «Արմավիայի» սնանկացման մասին, ոլորտի պատասխանատուները Հայաստանում գործող օտարերկրյա ընկերություններին խնդրեցին ավելացնել իրենց չվերթների քանակը, որպեսզի կարողանան բավարարել ուղևորափոխադրումների պահանջարկը: Իսկ ապրիլի 1-ը ավիացիոն շուկայում համարվում է ամառային սեզոն, այսինքն՝ տուրիստական շրջանի բացման սկիզբ: Այդ թեժ շրջանում ու մինչև այժմ հայկական ավիաշուկայում բոլոր ուղղություններով իշխում են միայն օտարերկրյա ընկերությունները, ինչի հետևանքով թանկացել են գրեթե բոլոր ուղղություններով ավիատոմսերի գները և բացասաբար ազդել ուղևորափոխադրումների հոսքի վրա: Իսկ «Էյր Արմենիայից» բացի՝ հայկական որևէ այլ ընկերության գործունեություն չի նշմարվում: Նաև հայտնի չէ, թե ի վերջո՝ ե՞րբ կսկսի աշխատել «Էյր Արմենիա» ընկերությունը կամ այս տարի թռիչքներ կիրականացնի՞, թե՞ ոչ:
