«Մենք բոմժ ենք, իսկական բոմժ». բողոքի ակցիա՝ ՀՀԿ ԳՄ նիստից առաջ (տեսանյութ)

ՀՀԿ ԳՄ նիստից առաջ, կուսակցության կենտրոնական գրասենյակի առջև այս պահին բողոքի ակցիա են անցկացնում Բուզանդի փողոցի խաբված բնակիչները: Նրանք հանդիպում են պահանջում վարչապետ Տիգրան Սարգսյանի հետ:

Բնակիչների պնդմամբ՝ վարչապետը դեռ սեպտեմբերի 3-ին խոստացել է իրենց հետ հանդիպել և խնդրին լուծում տալ, այսինքն ամեն քառակուսի մետրի համար գումար տալ, ապա հանդիպումը հետաձգել է մինչև սեպտեմբերի 17-ը, այնուհետև հրաժարվել է առհասարակ ընդունել և լսել իրենց:

Հուսահատ բնակիչները լրագրողների հետ զրույցում նշեցին, որ արդեն տասը տարի ապրում են վարձով բնակարաններում, և դրանց ամսական վարձը նույնիսկ ոչ ոք չի փոխհատուցում. «Մենք բոմժ ենք, իսկական բոմժ։ Սիրիահայերին տուն են տալիս՝ իսկ իրենց բոմժերին՝ ոչ. սա ի՞նչ է, ինչքա՞ն կարելի է խաբել մարդկանց, սա՞ է իրենց «ապահով» Հայաստանը, երբ նույնիսկ չորս պատով ապահովված չենք»:

Նշենք, որ վարչապետ Տիգրան Սարգսյանը սովորաբար կուսակցության նիստերին կենտրոնական մուտքից չի մտնում, այդ իսկ պատճառով Բուզանդի փողոցի բնակիչները նրան են սպասում ետնամուտքի մոտ: Նրանց են մոտենում ոստիկանները և հորդորում չփակել երթևեկելի հատվածը, սակայն վերջիններիս համբերության բաժակն այլևս լցված է, և նրանք չեն հեռանում փողոցից՝ նշելով, որ քայլ անգամ չեն անի մինչև չհանդիպեն վարչապետի կամ գոնե նրա ներկայացուցչի հետ:

Տեսանյութը՝ քիչ անց։