Ամենայն հավանականությամբ, կառավարության ծրագիրը Ազգային ժողով կներկայացվի երկուշաբթի օրը՝ հունիսի 19-ին: «Առաջին լրատվական»-ի հետ զրույցում այս մասին ասաց ՀՀԿ խմբակցության ղեկավար Վահրամ Բաղդասարյանը՝ հավելելով, որ այն կլինի հավակնոտ ծրագիր:
Նախորդ արտահերթ նիստին Ազգային ժողովը 57 կողմ, 23 դեմ, 0 ձեռնպահ ձայներով առաջին ընթերցմամբ ընդունեց «ՀՀ վարչատարածքային բաժանման մասին» և «Տեղական ինքնակառավարման մասին» ՀՀ օրենքներում փոփոխություններ կատարելու մասին օրինագիծը, որին դեմ քվեարկեց «Ծառուկյան» դաշինքը, «Ելքը» չմասնակցեց քվեարկությանը, կողմ էր ՀՀԿ-ն: Առաջին ընթերցմամբ՝ 57 կողմ, 21 դեմ, 0 ձեռնպահ, ընդունվեց նաև կառավարության ներկայացրած 2017-2020թթ. մասնավորեցման ծրագիրը, որին դեմ քվեարկեցին ընդդիմադիր «Ելք» խմբակցությունը և «Ծառուկյան» դաշինքի խմբակցությունը:
«Ծառուկյան» դաշինքը սպասում է կառավարության ծրագրին՝ քանի դեռ չի տեսել, չի շտապում մեկնաբանել: ԱԺ փոխնախագահ, «Ծառուկյան» դաշինքի պատգամավոր Միքայել Մելքումյանը «Առաջին լրատվական»-ի հետ զրույցում նշեց. «Կառավարությունը նոր է ձևավորվել, թող բերի տեսնենք՝ ինչ ծրագիր է բերելու»:
Նախորդ 7-8 ամիսների կառավարության աշխատանքը Միքայել Մելքումյանը գնահատեց հետևյալ կերպ. «Մենք ասում էինք, որ մեր կառավարման համակարգը լուրջ թերություններ ունի: Սա Սահմանադրության պահանջ է, որ ՀՀ նախագահի և վարչապետական ինստիտուտը իրավունքների և պարտականությունների մեջ որոշակի դիսոնանս է առաջացնում: Եվ այսօր մենք ապրում ենք նախորդ Սահմանադրության կառավարման համակարգով: Իսկ 2018-ի ապրիլին հստակ պարզ է լինելու, թե նոր ձևավորվող կառավարությունը վարչապետի ղեկավարությամբ ինչ դաշտում կգործի»,-ասաց նա:
Դիտարկմանը՝ եթե վարչապետի թեկնածուն լինի Սերժ Սարգսյանը, կաջակցի՞ արդյոք նրան «Ծառուկյան» դաշինքը, Միքայել Մելքումյանը ասաց, որ դա քաղաքական մեծամասնության խնդիրն է:
Նա նշեց, որ կան մոտեցումների տարբերություններ կառավարության որդեգրած քաղաքականությունից: Այդ տարբերությունը, Միքայել Մելքումյանի խոսքով, իրենց դաշինքի առաջարկած 15 կետերն են, որոնք ամենահրատապերն են, և որոնք չեն լուծվում, որովհետև կառավարման մեխանիզմը և մոտեցումները տարբեր են:
«Այս տարի նախատեսված է շուրջ 850 միլիոնի ներդրում, 3 տարվա ընթացքում՝ 3,2 միլիարդ: Պաշտոնական տվյալները նայեցի, արտահոսքի և ներհոսքի տարբերությունը կազմում է 40 միլիոն դոլար: Նշանակում է՝ ներդրումների ներգրավման մեխանիզմները թույլ են»,- ասաց նա՝ հավելելով, որ կան մոտեցումների տարբերություններ:
Նա նաև հավելեց, որ գյուղատնտեսության և շինարարության ոլորտներում կա անկում, իսկ այս երկու ոլորտները մեր տնտեսության լոկոմոտիվներից են:
Կա՞ արդյոք վարչապետի հրաժարականի պահանջ՝ հարցին նա հետևյալ կերպ արձագանքեց. «Կինոն սև ու սպիտակ չէ, այն մասով որ տարբերվում է, մեր մոտեցումները տարբեր են, եթե արդյունք ցույց չտա, մենք մեր մոտեցումները հստակ կասենք, Սահմանադրության մեխանիզմները մեզ թույլ են տալիս դա կիրառելու»:
Ի դեպ, Կարեն Կարապետյանի ներկայացրած նախորդ ծրագրին կողմ քվեարկեցին Հանրապետական և ՀՅԴ խմբակցությունները: ԲՀԿ-ն քվեարկությանը չմասնակցեց:
