Հայաստանը չի կարող միանալ մի միության, այս դեպքում` Մաքսային միությանը, որը կսահմանափակի նրա ազատությունն ու ինքնիշխանությունը: Այսօր տեղի ունեցած մամուլի ասուլիսի ժամանակ նման տեսակետ հայտեց «Անկախության երթ» ֆեյսբուքյան իվենթի անդամ Կարեն Թովմասյանը` հավելելով, որ նախաձեռնության անդամները սեպտեմբերի 21-ին մտադիր են դուրս գալ փողոց և վերահաստատել ազատ ու ինքնիշխան պետության մեջ ապրելու` 22 տարի առաջ կայացված որոշումը:
Ասուլիսի մյուս բանախոս, հրապարակախոս Մարինե Պետրոսյանն իր հերթին հավելեց, որ եթե Հայաստանը մտնի Մաքսային միություն, քսան տարիների բոլոր ձեռքբերումները մեկ ակնթարթում ջուրը կընկնեն: «Հայաստանն ինքնիշխան պետություն է, ինչն ամրագրված է Սահմանադրությամբ, իսկ Սերժ Սարգսյանը, հայտարարելով Մաքսային միությանը Հայաստանի անդամակցության հնարավորության մասին, խախտել է Սահմանդրությունը: Այսօր արդեն մենք կորցնում ենք մեր ինքնիշխանությունը: Երբ մարդ չորս տարի շարունակ մի բան է պնդում, և ընդամենը մեկ օրում փոխում է կարծիքը, ակնհայտ է դառնում, որ Սերժ Սարգսյանի վրա ճնշումներ են գործադրվել: Հնարավոր է` վաղը պահանջեն զոհել Ղարաբաղը, և նա զոհի նաև Ղարաբաղը»,- ասաց նա:
Մարինե Պետրոսյանի խոսքով՝ Մաքսային միությանն անդամակցության ֆենոմենը իշխանությունները սոցիալապես վատ վիճակում ապրող ժողովրդին բացատրում են խաբեությամբ: «Բայց երբ մեկ-երկու րոպե զրուցում եմ անծանոթ մարդկանց հետ, բացատրում Մաքսային միության բուն էությունը, մարդիկ ասում են՝ կա՞ այդ կառույցին մեր անդամությանը դեմ մի նախաձեռնություն, որին կարող ենք գալ-անդամագրվել»:
Ֆեյսբուքյան նախաձեռնությանը միացած Արմեն Հովհաննիսյանն էլ նշեց, որ ոչ ոք, անգամ երկրի նախագահը, իրավունք չուներ Մոսկվայում միանձնյա կերպով հայտարարել Հայաստանի՝ Մաքսային միությանն անդամակցելու մտադրության մասին: «Ոչ ոք իրավուքն չունի վտանգել ազգային ինքնիշխանությունը»,- ասաց նա:
