Թուրքական Radical թերթին տված հարցազրույցի ժամանակ Թուրքիայի արտգործնախարար Ահմեթ Դավութօղլուն ԱՄՆ-ին մեղադրել է Մերձավոր Արևելքի երկրների հանդեպ կողմնակալ վերաբերմունք ցուցաբերելու ու տարածաշրջանում անկայունությանը նպաստելու մեջ.
«Մերձավոր Արևելքում չի կարող տիրել խաղաղություն ու անվտանգություն, եթե Իսրայելին թույլ է տրվում վեր գտնվել միջազգային իրավունքի նորմերից ու օրենքներից։ Ցայժմ Իսրայելը պատասխան չի տվել ուղիղ մեկ տարի առաջ «Մավի Մարմարա» նավում 9 թուրք քաղաքացիների սպանության համար։ Անհրաժեշտ է, որ Իսրայելը նույնպիսի վերաբերմունքի արժանանա, ինչ և երկրագնդի մնացած երկրները։
Իսրայելը պետք է ճանաչի պաղեստինյան պետությունը և վերացնի Գազայի հատվածի շրջափակումը»։
Հիշեցնենք, որ 4 օր առաջ էլ Դավութօղլուն անդրադառնալով դեպի Գազայի հատված «Ազատության նավատորմ 2»-ի գործուղմանը, նշել էր. «Հուսով եմ, որ այս անգամ չեն կրկնվի նախորդ տարվա իրադարձությունները: Կարծում ենք, որ ելնելով նախորդ տարվա փորձից՝ Իսրայելն այլևս այդպիսի սխալ չի գործի: Եթե Իսրայելը ցանկանում է, որ նոր «Ազատության նավատորմեր» չառաքվեն Գազա, ապա պետք է ճանաչի պաղեստինյան նոր ղեկավարությունը և վերացնի ծովային շրջափակումը»: