36 երաժիշտ 11 երկրներից ժամանելու են Երևան՝ մասնակցելու հունիսի 6-13-ը կայանալիք Արամ Խաչատրյանի անվան միջազգային մրցույթին: Մրցույթի բացումն ազդարարող համերգը կբացի Հայաստանի պետական երիտասարդական նվագախումբը:
Մրցույթին մասնակցում են երաժիշտներ Հայաստանից, ԱՊՀ երկրներից, Եվրոպայից, ԱՄՆ-ից, Կանադայից, Ավստրալիայից, Լիբանանից, Իսպանիայից, Վրաստանից, Չինաստանից, Կորեայի Հանրապետությունից և Դոմինիկյան Հանրապետությունից: Այս տարի մրցույթի ժյուրին լինելու է բազմազգ:
Դաշնակահարների մրցույթի ժյուրիի նախագահն է լինելու Երևանի Կոմիտասի անվան պետական կոնսերվատորիայի դաշնամուրային ամբիոնի պրոֆեսոր, ՀՀ ժողովրդական արտիստ Սվետլանա Նավասարդյանը, ժյուրիի անդամներն են երաժիշտներ Ռուսաստանից, Կանադայից, Չինաստանից, Մեծ Բրիտանիայից, Ղազախստանից և Մեծ Բրիտանիայից:
Կոմպոզիտորների մրցույթի ժյուրիի նախագահն է լինելու Հայաստանի կոմպոզիտորների և երաժշտագետների միության նախագահ, Երևանի Կոմիտասի անվան պետական կոնսերվատորիայի Երաժշտության տեսության ամբիոնի վարիչ և պրոֆեսոր Ռոբերտ Ամիրխանյանը, ժյուրիի կազմում ընդգրկված են կոմպոզիտորներ Ռուսաստանից, Վրաստանից և Ղրղզստանից:
Արամ Խաչատրյանի անվան միջազգային մրցույթի կազմկոմիտեն սահմանել է հետևյալ մրցանակները. դաշնակահարների համար. 1-ին մրցանակ՝ 15,000 ԱՄՆ դոլար, ոսկե մեդալ և դափնեկրի դիպլոմ, ինչպես նաև Մարիինյան թատրոնի սիմֆոնիկ նվագախմբի (գեղարվեստական ղեկավար և գլխավոր դիրիժոր՝ Վալերի Գերգիև) կամ Մոսկվայի պետական ակադեմիական սիմֆոնիկ նվագախմբի (գեղարվեստական ղեկավար և գլխավոր դիրիժոր՝ Պավել Կոգան) հետ 2011-2012 համերգաշրջանի մասնակցության հնարավորություն, 2-րդ մրցանակակիրը կարժանանա 10,000 ԱՄՆ դոլար պարգևի, արծաթե մեդալի և դափնեկրի դիպլոմի, իսկ 3-րդ մրցանակակիրը՝ 5000 ԱՄՆ դոլարի, բրոնզե մեդալի և դափնեկրի դիպլոմի:
«Կոմպոզիցիա» անվանակարգի համար նախատեսված է մեկ մրցանակ՝ 5000 ԱՄՆ դոլարի չափով, ոսկե մեդալ և դափնեկրի դիպլոմ: Եզրափակիչ փուլի մասնակիցները, ովքեր չեն դարձել մրցանակակիր, պարգևատրվելու են դիպլոմով և 2000-ական ԱՄՆ դոլար գումարով:
Մրցույթի կազմակերպիչներն են ՀՀ Մշակույթի նախարարությունը, «Արամ Խաչատրյան – մրցույթ» մշակութային հիմնադրամը և Երևանի Կոմիտասի անվան պետական կոնսերվատորիան: Գլխավոր գործընկերն է ԱՊՀ-Հումանիտար համագործակցության միջպետական հիմնադրամը:
