Business Грузия-ի փոխանցմամբ՝ Վրաստանի նախագահ Միխեիլ Սաակաշվիլին ու Թուրքիայի վարչապետ Ռեջեփ Էրդողանն այսօր Բաթումում մասնակցել են «Բաթում-Անկարա» նոր ավիաչվերթի բացման արարողությանը։
Այս կապակցությամբ Միխեիլ Սաակաշվիլին հայտարարել է. «Մենք արդեն ավիաչվերթներ ունենք Ստամբուլի հետ, և այժմ թռիչքների աշխարհագրությունը մեծանում է։ Այդ ավիաչվերթի բացումը հաստատում է այն փաստը, որ երկու երկրների միջև հիրավի զարգանում են տնտեսական ու տրանսպորտային կապերը»։
Այսօր իրականացվել է «Բաթում-Անկարա» ավիաչվերթի առաջին թռիչքը։ Հունիսի 8-ից սկսած՝ այդ թռիչքները կդառնան կանոնավոր և կիրականացվեն շաբաթական երկու անգամ՝ երկուշաբթի ու շաբաթ օրերին։
Ավիատոմսի արժեքն սկսվում է 82 եվրոյից։ Բաթումի օդանավակայանը նաև սպասարկելու է Վրաստանին սահմանակից թուրքական շրջանները։
Հիշեցնենք, որ «Բաթում-Ստամբուլ» ավիաչվերթների իրականացումը սկսվել է 2007 թվականի մայիսի 29-ին՝ շաբաթական երեք անգամ՝ երեքշաբթի, հինգշաբթի, շաբաթ։