Հունաստանում ոստիկանությունը ձերբակալել է 23 մարդու՝ հակաֆաշիստական բողոքի ակցիայի ժամանակ կարգը խախտելու համար: Բողոքի ակցիան տեղի է ունեցել սեպտեմբերի 18-ին՝ Հունաստանի մի քանի քաղաքներում: Այս մասին հաղորդում է Agence France-Presse-ը:
Զանգվածային ելույթներ են տեղի ունեցել նաև մայրաքաղաք Աթենքում, որտեղ փողոց էր դուրս եկել շուրջ 5000 մարդ, և երկրի հյուսիսում՝ Սալոնիկում, որտեղ ցույցին մասնակցել է շուրջ 6000 հակաֆաշիստ: Հունաստանի արևմուտքում ՝ Պատրաս քաղաքում, ցույցի է դուրս եկել շուրջ 1000 մարդ: Նրանց մոտ եղել են դյուրավառ հեղուկով լի շշեր:
Ցուցարարները վանկարկել են՝ «Ոչնչացնել ֆաշիստներին», և կրել են պաստառներ՝ «Ֆաշիզմ, այլևս երբեք» գրությամբ: Մի շարք դեպքերում ոստիկանությունը ստիպված է եղել արցունքաբեր գազ կիրառել:
Ցույցերը սկսվել են այն բանից հետո, երբ երեքշաբթի լույս չորեքշաբթի գիշերը Աթենքի արևմուտքում սպանվել է 34-ամյա հիփ-հոփ կատարող Պավլոս Փիսասը, որը հակված էր ձախ հայացքների: Սպանության կասկածանքով ձերբակալվել են նեոնացիստական խմբի 45-ամյա անդամներից մեկը և նրա կինը:
Հունաստանում տեղի են ունեցել նաև խաղաղ ակցիաներ, որոնք կազմակերպել էր պետական ծառայողների արհմիությունը: Այդ ակցիաներին մասնակցել է շուրջ 20 հազար մարդ:
