Աշխարհում ջրի պաշարների սպառումը կհանգեցնի այն բանին, որ 2050 թվականին մոլորակի բնակչության մեկ քառորդը ջրի շարունակական կամ ժամանակավոր պակաս կզգա: Այս մասին հայտարարել է ՄԱԿ-ի գլխավոր քարտուղար Անտոնիու Գուտերիշը ՄԱԿ-ի Անվտանգության խորհրդի նիստում, որը նվիրված էր անդրսահմանային ջրահոսքերի հարցերին:
«Այն պայմաններում, երբ խմելու ջրի պահանջը դարի կեսին կաճի 40 տոկոսով, խմելու ջրի պակասի հարցն աճող մտահոգություն է հարուցում»,- ընդգծել է նա: «Եթե ջրային պաշարների կառավարման արդյունավետ մեխանիզմ չմշակվի, մենք կարող ենք հայտնվել մի իրավիճակում, երբ կտրուկ կսրվեն վեճերն առանձին համայնքների և նույնիսկ պետությունների միջև»,- նախազգուշացրել է նա՝ հիշեցնելով, որ աշխարհում կան 270 գետավազաններ, որոնք որպես քաղցրահամ ջրի աղբյուրներ են օգտագործում երկու կամ մի քանի երկրներ, և այդ գետավազանները խմելու ջրով են ապահովում մոլորակի բնակչության 40 տոկոսին՝ փոխանցում է TASS գործակալությունը։
