Սեպտեմբերի 17-ին Վարշավա աշխատանքային այց կատարած արտգործնախարար Էդվարդ Նալբանդյանը հանդիպում էր ունեցել Լեհաստանի ԱԳ նախարար Ռադոսլավ Սիկորսկու հետ։ Հանդիպման մանրամասների մասին տեղեկություն էին տարածել երկու երկրների ԱԳ նախարարությունների պաշտոնական կայքէջերը:
ՀՀ ԱԳ նախարարության կայքէջի համաձայն՝ ՀՀ արտգործնախարար Էդվարդ Նալբանդյանը հայտարարել էր. «Հայաստանը Արևելյան գործընկերության նախաձեռնության հենց սկզբից, անգամ դրանից առաջ ասել և շարունակում է ասել, որ պատրաստ է հնարավորինս սերտ, հնարավորինս ընդլայնված հարաբերություններ ունենալ Եվրամիության հետ, մոտ լինել Եվրամիությանն այնքան, որքան դա հնարավոր կլինի Եվրամիությանը, բայց ոչ ի վնաս և ի հաշիվ Ռուսաստանի հետ մեր դաշնակցային հարաբերությունների։ Նաև այդ համատեքստում պետք է դիտարկել Հայաստանի որոշումը՝ անդամակցել Մաքսային միությանը»:
Միևնույն ժամանակ Լեհաստանի ԱԳ նախարարությունն այլ բովանդակությամբ տեքստ էր հրապարակել՝ նախարարի խոսքերը մեջբերելով բառացիորեն այսպես. «Հայաստանը ցանկանում է խորացնել իր համագործակցությունը ԵՄ-ի հետ այնքան, որքան հնարավոր է, բայց դա չի կարող ուղղված լինել ՌԴ շահերի դեմ» (During his visit to Warsaw, Mr Eduard Nalbandian noted that his country wants to deepen its cooperation with the EU as much as possible, but “it cannot be directed against Russian interests.):
Հետաքրքրականն այն է, որ Նալբանդյանի հայտարարության լեհական տարբերակը բավականին մեծ իրարանցում և սկանդալ առաջացրեց սոցիալական ցանցերում՝ Էդվարդ Նալբանդյանին սկսեցին քննադատել Ռուսաստանի շահերի պաշտպանը և ազգային դավաճան լինելու մեջ: Սակայն հատկանշական է այն, որ այսօր Լեհաստանի ԱԳ նախարարության կայքէջում հայ նախարարի խոսքը փոխված է և ներկայացված հետևյալ կերպ. «Հայաստանը ցանկանում է խորացնել իր համագործակցությունը ԵՄ-ի հետ այնքան, որքան հնարավոր է, բայց դա չի կարող լինել ոչ ի վնաս Ռուսաստանի հետ դաշնակցային հարաբերությունների»:
«Առաջին լրատվական»-ի հետ զրույցում ԱԳՆ խոսնակ Տիգրան Բալայանն ասաց, որ այդ խոսքերն արդեն ուղղվել են լեհական նախարարության կայքէջում, ինքն էլ դրա վերաբերյալ հայտարարություն տարածել է՝ ասելով, որ նախարարը նման բան չի ասել, ասել է այնպես, ինչպես ՀՀ ԱԳՆ կայքէջում է ներկայացված:
