Այսօր ժամը 19:00-ին Երևանի Ազատության հրապարակում տեղի կունենա Հայ ազգային կոնգրեսի հանրահավաքը:
Այսօրվա հանրահավաքը հատկանշական է լինելու նրանով, որ դրան առաջին անգամ 2008-ից ի վեր մասնակցելու են համաներումով ազատ արձակված ՀՀ ԱԺ նախկին պատգամավոր Սասուն Միքայելյանը և ընդդիմադիր «Հայկական ժամանակ» թերթի գլխավոր խմբագիր Նիկոլ Փաշինյանը:
Այժմ Երևանի փողոցներով ընթանում են մեքենաներ՝ ՀԱԿ ակտիվիստներով, որոնք բարձրախոսներով կոչ են անում երևանցիներին մասնակցել հանրահավաքին և լսել Միքայելյանի և Փաշինյանի ելույթները:
2008 թվականի մարտի 1-2-ի դեպքերից հետո 3 տարվա ընթացքում առաջին անգամ Հայաստանի իշխանություններն արմատական ընդդիմությանը թույլ տվեցին հանրահավաք անցկացնել Ազատության հրապարակում։
Միաժամանակ սպասվում է, որ Նիկոլ Փաշինյանի և Սասուն Միքայելյանի մասնակցության պատճառով հանրահավաքը բազմամարդ է լինելու, չնայած նրան, որ ընդդիմության կողմնակիցների հաղորդագրությունների համաձայն մարզերից Երևան տանող ճանապարհները փակ են, իսկ ճանապարհային ոստիկանությունը պնդում է հակառակը:
Երևանի Ազատության հրապարակը մաքուր է և պատրաստ ընդդիմության հանրահավաքին:
