Այսօր ՀՀ պաշտպանության նախարար Սեյրան Օհանյանն այցելեց ԵՊՀ, որտեղ հանդիպեց պրոֆեսորադասախոսական անձնակազմի և ուսանողների հետ:
ԵՊՀ ռեկտոր Արամ Սիմոնյանը, ողջունելով նախարարին, ասաց, որ նա միշտ էլ սպասված հյուր է համալսարանում, և ԵՊՀ-ն շատ է կարևորում համալսարանի և նախարարության կապը:
Սեյրան Օհանյանը, ողջունելով ներկաներին, նախ շնորհավորեց ուսումնական տարին սկսելու համար և նշեց, որ երկրի պահպանության համար պետք է լավ կրթություն և խելացի պաշտպանություն:
Խոսելով բանակում առաջխաղացումների մասին՝ նա ասաց, որ 2011 թվականը մեր զինված ուժերի պատմության մեջ եղել է ամենալավ տարին, երբ ամենաքիչ պատահարները, հանցագործություններն ու կորուստներն ենք ունեցել: «Սովորաբար հաջողությունից հետո հանգստանում են, ամեն ինչ թուլանում է, և պատահարներ են տեղի ունենում: Դրա համար էլ 2012-ին բարելավումները քիչ էին, սակայն մենք պահպանել ենք անցյալ տարվա ցուցանիշը, իսկ 2013 թվականին, 2012-ի հետ համեմատած, արդեն գրեթե 30 տոկոսով քչացել են պատահարները զինված ուժերում»:
Նախարարը վերջում մի շարք համալսարանականների պարգևատրեց պատվոգրերով, իսկ ռեկտոր Արամ Սիմոնյանը նրան նվիրեց ԵՊՀ-ում հրատարակված՝ բանակին և հայոց պատմությանն առնչվող գրքեր:
Հանդիպմանը ներկա էին նաև երկու համալսարանական զինվորներ, որոնց նախարարը տասն օրով ազատ արձակման հրաման է տվել:
Մանրամասները դիտեք տեսանյութում:
