Հունիսի 5-ին Արամ Խաչատրյան համերգասրահում առաջին անգամ տեղի կունենա Ազգային մանկական մրցանակաբաշխությունը:
Մրցանակաբաշխության գլխավոր պրոդյուսեր Միքայել Մարգարյանի խոսքերով՝ մրցանակաբաշխության նպատակը տաղանդավոր, տարբեր օլիմպիադաներում, մրցույթներում 2010-2011 թթ. հաղթանակներ ունեցած երեխաներին խրախուսելը և մեծ բեմ բարձրացնելն է, արձանագրելը, որ մենք ունենք տաղանդավոր երեխաներ տարբեր ոլորտներում, ինչպես նաև մանուկների հանդեպ պետական ատյանների ուշադրությունը հրավիրելը:
«Մրցանակաբաշխությունների տեղատարափի մեջ մանկական մրցանակաբաշխությունը շատ ակտուալ է: Փորձել ենք տաղանդավոր երեխաների՝ տարբեր ասպարեզներից՝ երաժշտության, գեղարվեստի, սպորտի, մեկտեղել և թանկարժեք նվերներ, մրցանակներ, դիպլոմներ շնորհել»,- ասել է Միքայել Մարգարյանը՝ ավելացնելով, որ փորձել են լինել օբյեկտիվ, լավերի միջից ընտրել լավագույններին, քանի որ մրցանակաբաշխությունն ինքնին նեղանալու տեղիք է տալիս:
«Մի փրոդաքշըն» ընկերության տնօրեն Լիաննա Ստեփանյանը նշել է, որ երեխաներից լավագույներին (մինչև 16 տարեկան) ընտրելու հարցում օգնել են մշակույթի, սպորտի և կրթության նախարարությունների կողմից տրվող պաշտոնական տվյալները, որոնցից առանձնացվել են հիմնականում աշխարհի և Եվրոպայի չեմպիոնները: Մոտ քսան անվանակարգ է լինելու՝ երաժշտության մեջ լավագույն կատարող, դասական, ժողովրդական, երաժշտություն, գեղարվեստ, հեռուստատեսություն, ռադիո, թատրոն, կինո և այլն:
Մրցանակաբաշխության մտահղացման հեղինակ Անահիտ Հովհաննիսյանի խոսքերով էլ՝ մրցանակաբաշխության իրականացման գերխնդիրն է, որ այս ազգը ոչ միայն պարողներ և երգողներ ունի, այլ նաև ուրիշ ոլորտներում տաղանդներ ունի, որոնց հասարակությունը չի ճանաչում, բայց որոնք ճանաչելի լինելու խնդիր ունեն. «Երեխայի մեջ չպետք է լինի այն կարծիքը, թե պետք է միայն երգի ու պարի, որ դառնա աստղ, լինի ճանաչված, այլ պետք է իմանա, որ ֆիզիկայի կամ մաթեմատիկայի մրցույթներում հաղթող ճանաչվելն էլ է գնահատելի»,- ասել է Անահիտ Հովհաննիսյանը: