Ադրբեջանական Trend լրատվական գործակալության փոխանցմամբ, Ադրբեջանում ԱՄՆ դեսպան Մեթյու Բրայզան անդրադարձ է կատարել ղարաբաղյան հակամարտության կարգավորմանը.
«ԱՄՆ-ի, Ֆրանսիայի և Ռուսաստանի նախագահների դովիլյան հայտարարությունը ճիշտ է տարածաշրջանում կայանություն վերականգնման տեսանկյունից։ Ժամանակն է, որպեսզի համաձայնեցվեն ղարաբաղյան հակամարտության կարգավորմանն առնչվող հիմնարար սկզբունքները։
Դրանք կարող են դնել խաղաղության համաձայնագրի հիմքը։ Հետագա հապաղումը հարցականի տակ կդնի այդ համաձայնագրին հասնելու կողմերի ցանկությունը»։
Հիշեցնենք, որ մայիսի 26-ին Դովիլում ԱՄՆ նախագահ Բարաք Օբաման, Ռուսաստանի նախագահ Դմիտրի Մեդվեդևն ու Ֆրանսիայի նախագահ Նիկոլա Սարկոզին համատեղ հայտարարություն էին տարածել ղարաբաղյան հակամարտության կարգավորման շուրջ:
Դրանում երեք երկրների նախագահներն Ադրբեջանի ու Հայաստանի առաջնորդներին կոչ են արել բնակչությանը պատրաստել խաղաղության և ոչ թե պատերազմի, իսկ հունիսին կայանալիք հանդիպման ժամանակ ավարտին հասցնել հիմնական սկզբունքների մշակման վրա տարվող աշխատանքները։
Ի դեպ, դրա հաջորդ օրը Բրայզան ողջունել էր այդ հայտարարությունը՝ ընդգծելով, որ դեռ չի ծանոթացել այդ հայտարարության ողջ բովանդակությանը։