Հունիսի 3-ին կմեկնարկի «Երևանյան հեռանկարներ» երաժշտական միջազգային փառատոնը և մինչ տարեվերջ կներկայացնի շուրջ 10 ճանաչված խմբերի և մենակատարների համերգները Հայաստանում: Համերգաշրջանը կմեկնարկի հունիսի 3-ին։ Հանդես կգա Գրեմմիի մրցանակակիր, բազում ռեկորդների սահմանած The King’s singers խումբը, որը ընդգրկում է երաժշտական բոլոր ժանրերը՝ դասականից, միջնադարյան ստեղծագործություններից մինչև ռոք:
«Երևանյան փառատոնը 12 տարեկան է, այս փոքրիկ երկրում ահռելի բան տեղի ունեցավ: Մեր փառատոնը եվրոպական փառատոների շարքում 5 լավագույններից մեկն է, և 2007 թ. դարձել է եվրոպական փառատոների միության անդամ:
Խնդիրը միայն չափանիշն է: Կարևոր է միջավայր ստեղծել՝ բարձրակարգ երաժիշտներ տալու համար»,- լրագրողների հետ հանդիպման ժամանակ ասաց փառատոնի հիմնադիր, կոմպոզիտոր Ստեփան Ռոստոմյանը:
Այս տարի փառատոնի շրջանակներում Հայաստան է գալու նաև Գյուլբեկյան ֆոնդի նվագախումբը:
«Բոլոր համերգները ունենալու են հայկական թեքում: Չկա մի համերգ, որ չանդրադառնա հայկական ֆակտորին: Հայաստան եկած երաժիշտները էլի են ուզում վերադառնալ և սիրում են հայ հանդիսատեսին: Միշտ հիշում են Հայաստանը և իրենց հեղինակավոր դիրքից խոսում են մեր մասին: Ինչպես
Կուստուրիցան Թուրքիայում խոսեց Ցեղասպանության մասին»,- ասում է Ստեփան Ռոստոմյանը:
Փառատոնը ստեղծել է նաև իր ակադեմիան Բյուրականում: Ակադեմիան կգործի սեպտեմբերից և կհրավիրի հայտնի երաժիշների, ովքեր կգան և մեկամյա դասընթացներ կանցկացնեն հայ ուսանողների հետ: Եկող տարի դասընթացներ կանցկացնի նաև աշխարհի լավագույն ջութակահար Ցուկերմանը:
