«Առողջապահության նախարարը վարչապետի նման 1 տարի է հայտարարություններ է անում, որոնց պետք չէ լուրջ վերաբերել: Նա գործից հետո, թեյի, սուրճի սեղանի շուրջ մի քնաի մասնագետների հետ զրույցի է նստում, որի արդյունքները հաջորդ որը ի պաշտոնե հայտարարությունների տեսքով հրապարակում է: Դրան պետք չէ լուրջ վերաբերվել»,- «Առաջին լրատվական»-ի հետ զրույցում ասաց առողջապահության նախկին նախարար Արարատ Մկրտչյանը՝ անդրադառնալով ծխելու դեմ պայքարի վերաբերյալ ԱՆ Լևոն Ալթունյանի հայտարարություններին:
Հիշեցնենք, որ ծխելու դեմ պայքարի միջազգային օրվա շրջանակում ՄԱԿ-ում տեղի ունեցած ասուլիսի ժամանակ առողջապահության նախարար Լևոն Ալթունյանը հայտարարեց, որ Հայաստանի հանրային վայրերում կարգելվի ծխել: Նախարարը նշեց, որ օրենսդրական խիստ փոփոխություններ են սպասվում:
Նախարարությունը հույս ունի, որ այդ փոփոխությունների արդյունքում ծխողների թիվը կկրճատվի 30-40 տոկոսով։ Ըստ Ալթունյանի՝ ծխախոտի գովազդն ամբողջությամբ կարգելվի, իսկ ծխախոտի գինը կաճի։
«Այ մարդ, մի հատ նստեք, վերլուծեք մասնագետների հետ, միջազգային փորձն ուսումնասիրեք, մեր երկրի հնարավորություններից, կարողություններից ելնելով հայտարարություններ արեք: Իսկ այս նախարարը, երբ քնից արթնանաում է, նախորդ օրվա զրույցի արդյունքները հայտարարում է որպես պատրաստի օրենք: Այդպես չի լինում և այդպես չեն անում: Ես լրագրողներին ու հասարակությանը հորդորում եմ չմեկնաբանել այդ հայտարարությունները: Հիմա մարդ է, ծխախոտի դեմ պայքարի օրվա կապակցությամբ ինչ որ բաներ է ասել: Մի չարչարվեք դրանք մեկնաբանել: Ոչ մի բան էլ չի անելու և ոչ մի բան էլ չի լինելու: Անհոգ եղեք»,- մեզ հետ զրույցում ասաց նախկին նախարարը:
Նրա խոսքերով՝ ծխելու դեմ պետք է պայքարել, բայց պայքարը պետք է լինի հստակ, միջազգային փորձը հաշվի առնելով, մեր ազգային առանձնահատկությունները հաշվի առնելով, աստիճանաբար, բայց ոչ հայտարարվածի պես: «Աստիճանաբար, մտածված քայլերով պետք է պայքարել այդ չարիքի դեմ»,- եզրափակեց Մկրտչյանը:
Նշենք, որ այսօր Հայաստանում ամենօրյա ծխող է չափահաս տղամարդկանց 55 տոկոսը, կանանց՝ 3 տոկոսը։
