Այսօր խորհրդարանում լսումներ են «Քաղաքաշինության մասին» ՀՀ օրենքում փոփոխություններ և լրացումներ կատարելու վերաբերյալ։ Փոփոխություններով նախատեսվում է պարզեցնել քաղաքաշինության բնագավառում մի շարք ընթացակարգեր։ Օրինակ՝ այսուհետ հողերի նպատակային նշանակությունը փոխելու համար անհրաժեշտ չի լինի կառավարության որոշում, դա կարվի քաղաքացու դիմումի հիման վրա՝ համայնքապետի որոշումով։
ԱԺ ՀՅԴ խմբակցության պատգամավոր Լիլիթ Գալստյանը նշեց, որ փաթեթն իսկապես անհրաժեշտ էր, քանի որ «լրացնում է մեր օրենսդրության մեջ բազմաթիվ բացեր»։ Սակայն, ըստ Լ. Գալստյանի, ավելի ամբողջական կլիներ, եթե փաթեթում ներառվեր «Քաղաքաշինության հսկողության և վերահսկողության մասին» օրենքը։ Քաղաքաշինության նախարար Վարդան Վարդանյանն էլ նշեց, որ այդ օրենքի լրացումների և փոփոխությունների նախագիծը շուտով կներկայացվի ԱԺ։
