ԱՄՆ նախագահի նախկին թեկնածու Հիլարի Քլինթոնն անվանել է 2016 թվականի ընտրություններում իր պարտության պատճառներն ու մեղավորներին՝ գրում է The Hill-ը։
Նա իր անհաջողության մեղքը բարդել է այնպիսի գործոնների վրա, ինչպիսիք են Մոսկվայի միջամտությունը և կիբերհարձակումները, ՀԴԲ նախկին տնօրեն Ջեյմս Կոմիի և մի շարք ԶԼՄ-ների գործունեությունը, ինչպես նաև սեքսիզմը։
«Ես դարձել եմ տարածված ենթադրության զոհ, թե ես հաղթելու եմ»,-նշել է նա՝ հավելելով, որ շատ ընտրողներ որոշել են չքվեարկել՝ վստահ լինելով իր հաղթանակի հարցում։
Նա նաև նշել է, որ իր նամակագրության շուրջ սկանդալն ուռճացվել է, և իրեն մեղադրել է մի բանում, ինչն արել են շատ քաղաքական գործիչներ։ Քլինթոնն ընդգծել է, որ Կոմին, իր հերթին, ողջ ուշադրությունը նվիրել էր գողացված նամակներին առնչվող հայտարարություններին։
Քլինթոնի խոսքով, դառնալով ընտրությունների հիմնական թեկնածու, ինքը նկատել է, որ Դեմոկրատական կուսակցության Ազգային կոմիտեն գտնվում է սնանկության շեմին, ինչի արդյունքում կուսակցությունը մեծապես զիջել է Հանրապետականին։
Թրամփը մեկնաբանել է Քլինթոնի հայտարարությունները։ «Անազնիվ Հիլարի Քլինթոնը հիմա մեղադրում է բոլորին, բացի իրենից՝ հրաժարվելով խոստովանել, որ ինքը եղել է սարսափելի թեկնածու։ Մեղադրում է Facebook-ին և նույնիսկ դեմոկրատներին՝ Դեոկրատական կուսակցության Ազգային կոմիտեի հետ միասին»,-գրել է նա իր թվիթերյան էջում։
Ավելի վաղ ԱՄՆ նախկին պետքարտուղար Հիլարի Քլինթոնը թվիթերյան միկրոբլոգում Թրամփի թույլ տված սխալն անվանել էր «գաղտնի ուղերձ ռուսներին»։
