Ինչպես հայտնի է Սերժ Սարգսյանը երեկ մեկնել է Ռուսաստան՝ մասնակցելու այսօր Մոսկվայի Հայոց առաջնորդանիստ եկեղեցու օծման և եկեղեցական համալիրի բացման արարողությանը: Համալիրի գլխավոր ճարտարապետ Արտակ Ղուլյանն այսօր «Առաջին լրատվական»-ին հայտնեց, որ այն ազգային ճարտարապետական կանոններին հավատարիմ կառույց է, որի մասնաշենքերը կառուցվել են բաց ծիրանագույն, իսկ Մայր տաճարը՝ վարդագույն տուֆով, որը տարվել է Անի քաղաքից: Ճարտարապետը նաև հայտնեց, որ համալիրը կառուցվել է 40 խոշորագույն բարերարների ջանքերով, նրանց թվում կան նաև մեծ թվով հայտնի դեմքեր:
«Առաջին լրատվական»-ի տեղեկություններով՝ եկեղեցու կառուցմանը մասնակցել են Ռուսաստանի հայ գործարարները, Հայաստանի գործարարներն ու մի շարք պաշտոնյաներ: Ներդրողների մեծ մասը հիմնականում այստեղից իր բաժին տուֆ քարն է ուղարկել: Մեզ նաև հայտնի է դարձել, որ ռուսաստանահայ գործարարների ու հայաստանցի պաշտոնյաների մի մասն այդ քարը սեփականատերերից վերցրել ու դրա դիմաց չի վճարել և չի էլ ցանկանում վճարել: Իհարկե, քարը չի գնվել Գագիկ Ծառուկյանին կամ մեկ այլ հզոր գործարարին պատկանող հանքից, որ չհամարձակվեին չվճարել: Գնել են փոքր ու անհայտ գործարարներից, ովքեր տուֆի փոքրիկ հանքեր ունեն, որի շահագործումից հոգում են իրենց ընտանիքի կարիքները: Այսինքն՝ Մոսկվայում Հայոց առաջնորդանիստ եկեղեցին և եկեղեցական համալիրը կառուցվել է նաև «գցված» միջոցներով: Եվ ստացվում է, որ իրականում այդ եկեղեցին կառուցվել է ոչ միայն մեծահարուստների ներդրումների հաշվին, այլև՝ շարքային գործարարների շնորհիվ:
Երեկ այդ գործարարներն ու պաշտոնյաները Սերժ Սարգսյանի և Գարեգին Երկրորդ կաթողիկոսի հետ միասին մեկնել են Մոսկվա ու այսօր մասնակցել են Հայոց առաջնորդանիստ եկեղեցու օծման և եկեղեցական համալիրի բացման արարողությանը:
Ի դեպ, չի բացառվում, որ եկեղեցու համար քար մատակարարած այդ պաշտոնյաների ու խոշոր գործարարների անունները՝ որպես ներդրում կատարած բարերարների, գրված են եկեղեցական համալիրի պատերին կամ շրջակայքում տեղադրված որևէ վահանակի վրա, ինչպես դա արվում է նման դեպքերում: Չի բացառվում նաև, որ Գարեգին Երկրորդ կաթողիկոսն էլ օծման արարողության ժամանակ նրանց անունները հնչեցնի որպես բարերարներ:
Լուսանկարը` PanARMENIAN Photo-ի
