Իրանի նախագահ Հասան Ռուհանիի հանդիպումն ամերիկացի բարձրաստիճան պաշտոնյաների հետ կարող է կայանալ իրանական միջուկային ծրագրի հարցով «վեցյակի» հետ բանակցությունների շրջանակներում: ՄԱԿ-ի Գլխավոր ասամբլեայի նիստի շրջանակներում նման հանդիպումներ նախատեսված չեն: Այս մասին հաղորդում է IRNA գործակալությունը՝ վկայակոչելով Իրանի ԱԳՆ ներկայացուցիչ Մարզիյե Աֆհամին:
Ավելի վաղ ԶԼՄ-ները հաղորդել էին, որ ԳԱ նիստը կարող է դառնալ հարթակ՝ ԱՄՆ-ի և Իրանի նախագահների հանդիպման համար, որը կլիներ առաջինը 1979թ. հետո:
Սակայն Իրանի ԱԳՆ ներկայացուցիչը հաղորդել է, որ նախագահի ծրագրում նման հանդիպում նախատեսված չէ:
«Եթե «վեցյակի» խմբի հետ աշխատանքի ուղղությունը հասնի այդ պահին, երբ պահանջվի նման հանդիպում անցկացնել, այն կարող է կայանալ այդ շրջանակներում»,- ասել է Աֆհամը:
Վաշինգտոնի և Թեհրանի միջև դիվանագիտական հարաբերությունները խզվել են 1980թ. ապրիլի 7-ից՝ երկրում Իսլամական հեղափոխության հաղթանակից հետո: 1979թ. վերջից երկու երկրների առաջնորդները համատեղ որևէ միջոցառման չեն մասնակցել:
