Business Грузия-ի փոխանցմամբ՝ Նորվեգիան մասնակցելու է Վրաստանում հիդրոէլեկտրակայանների (ՀԷԿ) կառուցմանը։ Այս մասին հուշագիրը Վրաստանի և նորվեգական Qline Energy invest ընկերության միջև ստորագրվել է Օսլոյում կայացած գործարար ֆորումի շրջանակներում։
Ֆորումի աշխատանքներին մասնակցել է Վրաստանի էկոնոմիկայի նախարար Վերա Կոբալիան, որը հայտարարել է. «Գործարար ֆորումին մասնակցում էին Նորվեգիայի էներգոհատվածը ներկայացնող մինչև 60 ներկայացուցիչներ։
Հուշագրի կնքումից հետո նորվեգացի գործարարները հայտարարեցին Վրաստանի էներգոհատվածում ներդրումներ կատարելու իրենց շահագրգռվածության մասին։ Նրանք նաև մյուս երկրների գործարարներին կոչ արեցին գումարներ ներդնել Վրաստանի տնտեսության մեջ»։
Հուշագրի համաձայն՝ Qline Energy invest ընկերության գործադիր տնօրենը հունիսի սկզբին պետք է այցելի Վրաստան և մասնավորապես Աջարիա, ուր և ստորագրելու է մի շարք համաձայնագրեր։
Հիշեցնենք, որ առավել վաղ էլ նշվում էր, թե Վրաստանում հէկերի կառուցման հարցում շահագրգռվածություն են ցուցաբերել նաև Թուրքիան և ԱՄՆ-ը։
