Ադրբեջանի պաշտպանության նախարարության բարձրաստիճան պաշտոնյաները, հասարակության, մտավորականության ներկայացուցիչներն այսօր այցելել են շփման գծում՝ Տերտերի շրջանում տեղակայված զորամաս:
Ինչպես հաղորդում է APA գործակալությունը, Ադրբեջանի ՊՆ-ի մամլո ծառայության ղեկավար Էլդար Սաբիրօղլուն մամլո ասուլիս է տվել: Անդրադառնալով շփման գծից դիպուկահարներին հեռացնելու միջազգային կազմակերպությունների պահանջներին՝ նա նշել է, որ Ադրբեջանի պետությունը և ՊՆ-ը հրաժարվում են անել դա:
«Մենք դիպուկահարներին չենք հեռացնի մինչև պատերազմի ավարտը»,- հավելել է նա:
Ի պատասխան ադրբեջանական բանակում զինվորների մահվան դեպքերին վերաբերող հարցին՝ Սաբիրօղլուն նշել է, որ ՊՆ-ն չի թաքցնում և չի խեղաթյուրում զինվորների մահվան փաստերը, և ամբողջ տեղեկատվությունը ներկայացվում է հասարակությանը:
