Դաշնակցությունը մշակել է «Մենք ապրելու ենք մեր երկրում»՝ արտագաղթի կանխարգելմանն ուղղված ծրագիր, որի նպատակն է կասեցնել արտագաղթը, որ մեր գլխավոր հիմնահարցն է դարձել:
Այսօր լրագրողների հետ հանդիպմանը նշեց ՀՅԴ Գերագույն Մարմնի անդամ Արմեն Ռուստամյանը: Նրա դիտարկմամբ, անկախ նրանից՝ քաղաքական ուժը որ դաշտոմ է՝ ընդդիմադիր թե իշխանական, արտագաղթի այնպիսի տեմպեր ենք արձանագրում, որ դա կանխելը պետք է լինի յուրաքանչյուր քաղաքական ուժի օրակարգում:
«Այս մարտահրավերի ամբողջական ծավալի գիտակցումը, դրան ուղղված քայլերը հրամայական են դարձել»,- ասաց Արմեն Ռուստամյանը:
Ըստ նրա՝ անհրաժեշտ է նոր փուլ սկսել՝ համախմբելու մեր հանրությանը: Արտագաղթի մասին տարբեր տեսակետներ կարելի է ունենալ, բայց, Ա.Ռուստամյանի խոսքով, հիմնական պատճառը մեր պետական համակարգն է, որն այնպիսին է, որ թույլ չի տալիս խնդիրներն օր առաջ լուծել: Մյուս խնդիրը իշխող կուսակցության և պետության նույնացումն է: Նա նշեց, որ եղել են տարիներ, երբ մեկնողների և վերադարձողների բալանսը նույնն է եղել, բայց վերջին տարիներին այնպիսին են տեմպերը, որ ժողովրդագրական աղետի առաջ ենք կանգնած:
«Հիմա պետք է դադարեցնել արյունահոսությունը. մեր ընկալմամբ՝ արտագաղթը նման է օրգանիզմի արյունահոսության, և հիմա թույլ չպետք է տանք օրգանիզմի արյունաքամություն»,- ասաց նա՝ հավելելով, թե սպասել, որ ամբողջական իշխանափոխությունից հետո այս ծրագիրն իրականացվի, սխալ մոտեցում կլինի, այդ պատճառով մեր խնդիրներին ամբողջական լուծում տալու համար պետք է մեր կողմից առաջին փորձն արվի՝ գնահատելու իրավիճակը, լուծումներ առաջարկելու, ներկայացնելու իշխանությանը, առաջին հերթին՝ պատասխանատուներին:
Արծվիկ Մինասյանը, որը գլխավորել է ծրագրի աշխատանքները, նշեց, որ ծրագիրը ոչ թե կուսակցական, այլ ազգային ծրագրի կարգավիճակ պետք է ստանա, որ կյանքի կոչվի: Այս ծրագիրը պետք է ներգրավի թե՛ իշխանությանը, թե՛ ընդդիմությանը, թե՛ քաղաքացիներին, թե՛ Սփյուռքին, բոլորը պետք է ներգրավվեն այս ծրագրի մեջ: Նա նշեց, որ ծրագրին ուղղված առաջին քննարկումը վաղը կլինի ազգագրագետների, ժողովրդագետների հետ:
Ծրագիրը կառուցված է տասնմեկ հիմնական ուղղություններից, որոնցից է կադրային քաղաքականությունը, որտեղ մենք, որպես սկզբունք, որդեգրում ենք բիզնեսի և քաղաքականության տարանջատումը: Մյուս ուղղություններ են՝ ստեղծել նոր աշխատատեղեր և արդարացի վարձատրության համակարգ, ինչպես նաև հարկային ևն մաքսային համակարգը դարձնել կանխատեսելի, ներդրումները խրախուսող, սոցիալականից անցնել արդյունաբերական գյուղատնտեսության, կրթությունը դարձնել որակյալ և մատչելի, ապակուսակցականացնել կրթական համակարգի ղեկավարումը, ներդնել առողջության պարտադիր ապահովագրության համակարգ, վերացնել անպատժելիությունը, բարձրացնել երկրի անվտանգության մակարդակը, իրականացնել վերաբնակեցում, ինչպես նաև ձևավորել Հայաստանում արժանապատիվ ապրելու համոզմունք ու ազատ քաղաքացու կերպար:
Լուսանկարը՝ PanARMENIAN Photo-ի
