ԱՄՆ նախագահ Բարաք Օբաման ստորագրել է հատուկ կարգադրություն, համաձայն որի՝ թույլ է տրվում հակաքիմիական պաշտպանության միջոցներ մատակարարել Սիրիա: Այս մասին հայտնում է Սպիտակ տունը:
Կարգադրությամբ հանվում է սպառազինության մի շարք տեսակներ Սիրիա մատակարարելու արգելքը: Մասնավորապես, Սիրիա կմատակարարվեն հակաքիմիական սարքավորումներ, այդ թվում՝ Քիմիական զենքի արգելման կազմակերպության համար: Ենթադրվում է, որ օգնություն կցուցաբերվի տեղի բժիշկներին՝ հավանական քիմիական հարձակմանը նախապատրաստվելու և պատասխանելու համար:
Կանցկացվի նաև սիրիական ընդդիմության «ընտրված» անդամների ուսուցում՝ քիմիական զենքից նրանց պաշտպանելու համար:
ՄԱԿ-ի փորձագետները խոստովանել են Լիբիայից Սիրիա զենքի մատակարարման խնդիրը: Լիբիայի դեմ պատժամիջոցների հարցերով ՄԱԿ ԱԽ կոմիտեն նախազգուշացրել է զենքի մաքսանենգության «ապակայունացնող էֆեկտի» մասին:
Նման մատակարարումների մասին տեղեկությունը ԱԽ փորձագետները երկրորդ ամիսն են հետաքննում Ռուսաստանի հայցով՝ փոխանցում է ITAR-TASS-ը:
«Փորձագետների խումբն իր անհանգստությունն է հայտնել Լիբիայի սահմաններից դուրս բոլոր ուղղություններով զենքի ու զինամթերքի տարածման առնչությամբ և նշել Լիբիայից Սիրիայի արաբական հանրապետություն ծովային և օդային ճանապարհով զենքի ու զինամթերքի մաքսանենգության դեպքերին առնչվող հաղորդագրությունների թվի աճի մասին»,- Անվտանգության խորհրդի նիստում հայտնել է կոմիտեի նախագահ, ՄԱԿ-ում Ռուանդայի մշտական ներկայացուցիչ Յուջին-Ռիչարդ Հասանը:
Խնդրի լրջությունն է նշել նաև Լիբիայի հարցով ՄԱԿ-ի հատուկ ներկայացուցիչ Տարեք Միտրին:
«Գաղտնիք չէ, որ լիբիական սահմանների անվտանգությունը չի ապահովվում: Զենքի հոսքը Լիբիա և Լիբիայից դուրս վերահսկողությունից դուրս է եկել»,- ասել է նա:
Լիբիայից սպառազինության արտահանման արգելքը ներմուծվել էր ՄԱԿ ԱԽ-ի 1970 բանաձևով, որն ընդունվել էր 2011-ին՝ հյուսիսաֆրիկյան երկրում հակամարտության թեժ պահին:
