Այսօր Նյու Յորքում գտնվող ՄԱԿ-ի կենտրոնակայանում աշխատանքն է սկսում Գլխավոր ասամբլեայի 68-րդ նստաշրջանը: Բացման պաշտոնական արարողությունը կկայանա տեղի ժամանակով ժամը 15.00-ին (Երևանի ժամանակով՝ ժամը 23.00-ին):
Աշխատանքի տարեկան ցիկլի մեկնարկը կհայտարարեն ՄԱԿ-ի գլխավոր քարտուղար Պան Գի Մունն ու Գլխավոր ասամբլեայի 68-րդ նստաշրջանի ընտրված նախագահ՝ Անտիգուայից և Բարբուդայից դիվանագետ Ջոն Ուիլյամ Էշը: Այս մասին հայտնում է ITAR-TASS-ը:
Օրակարգում 170 թեմա է, այդ թվում՝ անվտանգությանն ու խաղաղության աջակցմանը, զինված հակամարտությունների կանխմանը առնչվող, հարցեր, որոնք վերաբերում են շրջակա միջավայրի պաշտպանությանը, երկրների կայուն զարգացմանն աջակցելուն, միջուկային չտարածման ռեժիմի պահպանմանը, մարդու իրավունքների պաշտպանությանը և իրավունքի գերակայության ապահովմանը: Կքննարկվեն նաև հարցեր, որոնք առնչվում են կազմակերպության աշխատանքի ակտիվացմանը:
Նստաշրջանի շրջանակում կկայանա քաղաքական ընդհանուր քննարկում, որը տեղի կունենա պետությունների ղեկավարների, վարչապետների և արտգործնախարարների մասնակցությամբ՝ սեպտեմբերի 24-ից հոկտեմբերի 1-ը: Կքննարկվեն մերձավորարևելյան խնդրի կարգավորման և սիրիական հակամարտության լուծման հարցերը:
Մեծ ուշադրություն կգրավի Իրանի նոր նախագահ Հասան Ռուհանիի առաջին ելույթը, որը ծրագրված է ընդհանուր քաղաքական քննարկման առաջին օրը: Բացի այդ, որոշակի սպասումներ կան՝ կապված Սիրիայի փոխարտգործնախարար Ֆեյսալ Միկդադի ելույթի հետ:
Շաբաթվա ընթացքում՝ նստաշրջանի աշխատանքի գլխավոր փուլի ժամանակ, կանցկացվեն բարձր մակարդակով տասնյակ հանդիպումներ:
