Աջափնյակ և Դավթաշեն վարչական շրջանների ընդհանուր իրավասության դատարանում Դավիթ Բալայանի նախագահությամբ ավարտվել է Հարություն Հովհաննիսյանի գործի դատավարությունը:
38-ամյա Հարությունը ոստիկանության ուղեկցող գումարտակի ջոկի ավագն էր:
2013 թվականի ապրիլի 18-ին Հովհաննիսյանը վերակարգով նշանակված է եղել ավազակային հարձակման ու սեռական ոտնձգության համար մեղադրվող Արմեն Կաբալյանին «Նուբարաշեն» ՔԿՀ-ից Երևանի Աջափնյակ և Դավթաշեն վարչական շրջանների ընդհանուր իրավասության դատարան ուղեկցող պահակախմբում՝ որպես ավագ և տվյալ կալանավորի ուղեկցման համար պատասխանատու:
Հարություն Հովհաննիսյանը խախտել է համապատասխան օրենքի պահանջները, դատարան ժամանելով՝ չի կազմակերպել կալանավորի հանձնումը դատական կարգադրիչներին՝ փաստացի շարունակելով կալանավորի ուղեկցումը նաև դատարանի շենքում ու պատասխանատու մնալով ուղեկցման համար: Հովհաննիսյանը, ըստ դատական ակտի, չի տիրապետել ուղեկցման երթուղու առանձնահատկություններին՝ տվյալ դատարանի նկուղային հարկում գտնվող խցերի փականների անհուսալիությանը, դրանք ներսից հեշտությամբ բացելու հնարավորությանը:
Հովհաննիսյանը Կաբալյանին տեղավորել է խցերից մեկում, ստանձնել այլ կալանավորների ուղեկցումը դատական նիստերի դահլիճ, չի հաստատել ուղեկցողների միջև համագործակցության կարգ:
Արդյունքում, դատարանի նկուղային հարկում տեղակայված խցի երկու կալանավորներ ժամը 17-ի սահմաններում մնացել են առանց պատշաճ հսկողության: Կալանավոր Արմեն Կաբալյանը ներսից՝ ճաղավանդակի արանքից կարողացել է հետ հրել շարժական փականի լեզվակը, բացել խցի դուռը և դիմել փախուստի:
Ըստ դատական ակտի՝ ծառայության նկատմամբ Հարություն Հովհաննիսյանի անբարեխիղճ և անփույթ վերաբերմունքի հետևանքով ծանր հանցագործությունների համար մեղադրվող, դատարանի որոշմամբ կալանավորված անձը հայտնվել է ազատության մեջ, դրանով վնասել արդարադատության շահը, իրական վտանգ է ստեղծվել գործով տուժողների կյանքի և առողջության համար:
Կաբալյանը հայտնաբերվել է փախուստից երկու շաբաթ անց:
Հարություն Հովհաննիսյանը մեղավոր է ճանաչվել ՀՀ քրեական օրենսգրքի 315 հոդվածի 1-ին մասով և դատապարտվել 400 հազար դրամ տուգանքի:
