Մեդիամաքսի հաղորդմամբ՝ Kempinski-ի Արևելյան Եվրոպայում հասարակության հետ կապերի պատասխանատու Լանա Մելնիկովան, մեկնաբանելով որոշ ԶԼՄ-ների հրապարակումները այն մասին, որ Հայաստանի ԱԳ և էներգետիկայի և բնական պաշարների նախարարությունների շենքները փոխանցվելու են Kempinski հյուրանոցին, նշել է, որ Kempinski հյուրանոցը գտնվելու է արտգործնախարարության շենքից ոչ հեռու և կապ չի ունենալու Հանրապետության հրապարակի վրա տեղակայված ԱԳՆ շենքի հետ:
Այս տարվա փետրվարին տարածված մամուլի հաղորդագրության մեջ ասվում էր, որ «Կեմպինսկի Երևան» հյուրանոցը կլինի Kempinski-ի առաջին նախագիծը Հայաստանում և կտեղակայվի Ամիրյան փողոցի վրա, արտգործնախարարության շենքի մոտակայքում: «Շքեղ հինգաստղանի հյուրանոցը իր հյուրերին կառաջարկի 150 սենյակներ և լյուքս համարներ»,- ասված էր մամուլի հաղորդագրությունում: Նշվում էր նաև, որ հյուրանոցի բացումը նախատեսված է 2013 թ.-ին:
Ըստ Մեդիամաքսի տեղեկությունների, շենքը, որտեղ կտեղակայվի «Կեմպինսկի Երևան» հյուրանոցը, պատկանում է մոսկովյան «Յունիաստրում բանկ»-ի նախագահ Գագիկ Զաքարյանին: Ըստ մեր տեղեկությունների, «Կեմպինսկի Երևան» նախագծում նրա գործընկեր է հանդիսանում «Ռուցոգ» ներդրումային և շինարարական հոլդինգը, որի սեփականատերն է Մոսկվայում ապրող հայազգի գործարար: Ներկայումս «Ռուցոգ»-ը Մոսկվայում իրականացնում է «Նիկոլսկայա Կեմպինսկի Մոսկվա» հյուրանոցի շինարարությունը, որի բացումը նախատեսված է 2012 թ.-ին:
