Պոլսո Հայոց պատրիարքական փոխանորդ Արամ արքեպիսկոպոս Աթեշյանը երեկ վերջապես հրաժարական տվեց՝ կոչ անելով համախմբվել և պատրաստվել պատրիարքի ընտրություններին. «Մեր կոչն է համախմբուիլ Տեղապահ Սրբազան Հօր շուրջ եւ ջանք ու եռանդ չխնայել՝ ժամ առաջ մեր Աթոռի նոր գահակալը ողջունելու ճանապարհին։ Իրեն այժմէն կը մաղթենք բարի գալուստ, յաջողութիւն, ուժ եւ կարողութիւն՝ ի պայծառութիւն եւ յանսասանութիւն մեր դարաւոր Պատրիարքական Աթոռին»,- ասված է Արամ սրբազանի տարածած հայտարարության մեջ։
Հիշեցնենք, որ Պոլսո Հայոց պատրիարքական փոխանորդ Արամ արքեպիսկոպոս Աթեշյանը հրաժարական է տվել «Հովակիմ 1461» հիմնադրամի նախագահի պաշտոնից, սակայն չի պատրաստվում հրաժարական տալ փոխանորդի պաշտոնից։ Մարտի 15-ին տեղապահի ընտրությունից հետո Արամ սրբազանը, տեսնելով, որ տեղապահ ընտրվել է Գարեգին Բեկչյանը, ներկայացնում է Ստամբուլի փոխնահանգապետի գրությունը, ըստ որի՝ տեղապահի ընտրություններն անօրինական են։
Երեկ իր նամակով Գարեգին Բեկչյանին Աթեշյանը հրավիրել է պատրիարքարան՝ ստանձնելու իր տեղապահի պարտավորությունները և ստանձնելու պատրիարքի ընտրությունները կազմակերպելու գործընթացը:
Ստամբուլի «Ժամանակ» թերթի գլխավոր խմբագիր Արա Գոչունյանը Աթեշյանի այս քայլը բարձր է գնահատում, կարծում է, որ համայնքում առկա մեծ «ալեկոծումները» ի վերջո կհանդարտվեն: «Այս իրադարձությունները եղել են Ամենայն հայոց վեհափառ հայրապետի գիտությամբ և օրհնությամբ, և վեհափառ հայրապետը երկու եպիսկոպոսների հետ էլ խոսել է, իր դրական հորդորը և օրհնությունն է փոխանցել, որպեսզի շարունակությունը տարբերվի մինչև հիմա եղած դժվարություններից»,- ասաց Արա Գոչունյանը:
Արամ Աթեշյանի այս քայլը Արա Գոչունյանը պայմանավորում է Թուրքիայում սահմանադրական հանրաքվեից հետո ընկած ժամանակաշրջանով: Արամ արքեպիսկոպոս Աթեշյանը և Պոլսո հայկական Սուրբ Փրկիչ հիվանդանոցի հոգաբարձուների խորհրդի նախագահ Պետրոս Շիրինօղլուն այս ընթացքում բազմաթիվ հանդիպումներ են ունեցել թուրքական իշխանությունների հետ:
«Եթե պարոն Պետրոս Շիրինօղլուի ծավալած գործունեությունը եղել է ավելի հրապարակային, Արամ արքեպիսկոպոս Աթեշյանը նախընտրել է ավելի լուռ այդ աշխատանքները առաջ տանել, որովհետև իր ընդդիմախոսները իր ցանկացած նախաձեռնություն մեկնաբանում էին որպես պատրիարքի ընտրությունը հապաղեցնելու, գործընթացը դանդաղեցնելու միտումնավոր նպատակներով և այլն: Պատրիարքարանը նախընտրեց իր գործունեությունը լռելյայն առաջ տանել»,- ասաց Արա Գոչունյանը՝ հավելելով, որ այս հանդիպումների, շփումների արդյունքում հնարավոր եղավ համոզիչ փաստեր ներկայացնել պատկան իշխանություններին, որ մեր եկեղեցու սահմանած կարգի և պետության սպասումների միջև առաջացած տարբերությունները կրճատվեն, և գործընթացը առաջ մղվի: Արդյունքում պետական շրջանակները «կանաչ լույս» վառեցին՝ պատրաստակամություն հայտնելով Գարեգին արքեպիսկոպոս Բեկչյանին որպես տեղապահ ճանաչելու:
Ի դեպ, Արամ սրբազանը պատրիարքարանում խորհրդակցություն է հրավիրել, տեղեկացրել է, որ պատրաստվում է հրաժարական տալ, և հրավիրել է Բեկչյանին գալ տեղապահի աշխատանքները իրականացնելու:
«Առաջին ձեռքբերումն այն է, որ համայնքը քաոսային կացությունից դուրս բերելու համար լուրջ նախաձեռնություն է, երկրորդ՝ անցյալ շաբաթների ընթացքում շատ խոսվեց այն մասին, որ Թուրքիա պետությունը միջամտում է Պոլսո պատրիարքական աթոռի ներքին գործերին, նաև այդ տպավորությունները հերքելու և պետության վրայից այս խնդիրները թոթափելու նպատակ ուներ»,- ասաց նա:
Արա Գոչունյանը տեղեկացրեց, որ Արամ սրբազանի հրաժարականի նույն պահին Պետրոս Շիրինօղլուն հանդիպում է ունեցել նահանգապետի հետ, և բոլոր ուղղություններով աշխատանք իրականացավ:
Հարցին՝ արդյոք թուրքական իշխանությունների հորդորով չի՞ հրաժարական տալիս Արամ սրբազանը, Արա Գոչունյանը բացառեց. «Նա պարզապես տրամադրությունները հաշվի առնելով՝ տեսել է, որ պահը հասունացել է, և իր հոժար կամքով է այս քայլին գնացել: Նաև եկեղեցական համագումարի կողմից ընտրված օրինական տեղապահին հրավիրել է պատրիարքարան, նրան կզորակցի նաև ընտրությունների կազմակերպման հարցերում»:
«Ակոս» շաբաթաթերթի հայկական բաժնի խմբագիր Բագրատ Էստուկյանը Աթեշյանի քայլը պայմանավորում է ժողովրդի՝ հրապարակավ անհանգստությամբ, դժգոհությամբ: Իրավիճակը, նրա խոսքով, չէր կարող նման կերպ շարունակվել: Բագրատ Էստուկյանը մեկ այլ բանի վրա է ուշադրություն սևեռում. նախօրեին Արամ Աթեշյանը ժողով է հրավիրել, սակայն «Ակոս» պարբերականից ոչ ոք չի հրավիրվել, հրավիրել է իր ցանկալի լրատվամիջոցներին, իսկ թե ինչ խոստումներ է տվել այդ հանդիպմանը՝ պարզ չէ: Այդ լրատվամիջոցները, նրա խոսքով, Աթեշյանի կողքին են:
Արամ Աթեշյանը թեև կլինի պատրիարքի թեկնածու, բայց Բագրատ Էստուկյանը վստահ է՝ նա չի կարող հաջողել այս ընտրություններին, քանի որ ժողովրդի մեջ չունի վստահություն:
Գարեգին արքեպիսկոպոս Բեկչյանը տեղեկացրել է, որ առաջիկա տասը օրերի ընթացքում կլինի պատրիարքարանում: 2017-ի ընթացքում, ըստ ամենայնի, Պոլսո հայոց պատրիարքությունը նոր պատրիարք կունենա:
