Թուրքական Cumhuriyet թերթը, վկայակոչելով բրիտանական The Independent պարբերականի Մերձավոր Արևելքի փորձագետ Ռոբերտ Ֆիսկին, նշում է, որ Սիրիայում քաղաքացիական պատերազմ սկսվելու դեպքում գաղթականների մեծ ներհոսքը կանխելու համար Թուրքիան պատրաստվում է ներխուժել Սիրիա և ստեղծել անվտանգության գոտի.
«Թուրքիան զայրացած է Սիրիայի նախագահ Բաշար Ալ-Ասադի վրա, քանի որ նա երկու անգամ խոստացել է բարեփոխումներ իրականացնել, ապա դրժել է խոստումը։ Թուրքական իշխանությունները երկու անգամ պատվիրակություններ են առաքել Սիրիա, արդյունքում Ասադը խոստացել էր փողոցներից հեռացնել զինվորականներին ու վերջ դնել բռնություններին։ Ընդ որում, երկրորդ դեպքում Ասադն անձամբ խաբել է Թուրքիայի արտգործնախարար Ահմեդ Դավութօղլուին։
Այժմ թուրքական կառավարությունը Սիրիա ներխուժելու և անվտանգության գոտի ձևավորելու գաղտնի պլան է մշակել։ 1991 թվականի Պարսից ծոցի պատերազմի ժամանակ Թուրքիա էին գաղթել մեծ թվով իրաքյան քրդեր։ Այժմ այդ իրավիճակը կարող է կրկնվել Սիրիայի պարագայում։ Դա կանխելու համար Թուրքիան պատրաստ է մի քանի գումարտակ առաքել Սիրիա և անվտանգության գոտի ձևավորել»։
Հիշեցնենք, որ երեկ Դավութօղլուն հերթական անգամ սիրիական իշխանություններին կոչ էր արել դադարեցնել արյունահեղությունը։
Չպետք է մոռանալ, որ մայիսի 25-ին թուրքական Milliyet թերթը, վկայակոչելով Իսրայելի կառավարությանը մոտ կանգնած DEBKA հետախուզական կայքը, նշել էր, թե Սիրիայի նախագահ Բաշար Ասադն արագորեն կորցնում է Թուրքիայի վարչապետ Էրդողանի և մուսուլմանական աշխարհի աջակցությունը.
«DEBKA-ի տվյալներով՝ Էրդողանը կառավարության ներկայացուցիչների հետ դռնփակ հանդիպման ժամանակ նույնիսկ հրահանգել է կարճ ժամանակահատվածում խզել Դամասկոսի հետ հարաբերությունները: Դա հիմնականում պայմանավորված է քրդական գործոնով:
Էրդողանի վճիռն ազդեցություն կունենա թուրք-իսրայելական հարաբերությունների վրա: Էրդողանը սիրիական ընդդիմադիր առաջնորդներին թույլատրել է մայիսի 31-ից հունիսի 2-ը հանդիպումներ ունենալ Թուրքիայում»:
