Մինչև 2014-ի կեսերը սիրիական քիմիական զենքի ոչնչացումը իրագործելի խնդիր է: ITAR-TASS-ի հետ զրույցում նման կարծիք է հայտնել Սպառազինությունների վերահսկողության ամերիկյան ասոցիացիայի ղեկավար Դերիլ Քիմբոլը՝ մեկնաբանելով սիրիական քիմիական զենքին առնչվող ռուս-ամերիկյան պայմանավորվածությունները:
Համաձայն պայմանավորվածությունների՝ ՌԴ-ն ու ԱՄՆ-ը պետք է ոչնչացնեն Սիրիայում բոլոր տեսակի քիմիական զենքերն ու սարքավորումները՝ այդ օպերացիան ավարտելով 2014-ի առաջին կեսին:
Մասնագետն իրագործելի և իրատեսական է համարում մինչև նշված ժամկետն այս գործընթացի ավարտը: Նրա խոսքով՝ դեռևս դժվար է գնահատել այդ օպերացիայի անցկացման հետ կապված ֆինանսական ծախսերի մասշտաբները:
Նա կարծում է, որ ընդհանուր գումարը հավանաբար պակաս կլինի 100 մլն դոլարից: Ինչ վերաբերում է օպերացիայի ֆինանսավորմանը, Քիմբոլը նշել է, որ ԱՄՆ-ն ունի հատուկ հիմնադրամ՝ նախատեսված նման տեսակի օպերացիաների համար: Մասնագետը, սակայն, նշել է, որ ծախսերի հիմնական մասը կփակի Քիմիական զենքի արգելման հարցերով կազմակերպությունը: Նա չի բացառել, որ իր ներդրումը կունենա նաև Ռուսաստանը:
Նա կասկած է հայտնել այն կապակցությամբ, թե սիրիական քիմիական զենքի ոչնչացման հարցում կգործարկվի Նանն-Լուգար ծրագիրը:
Նշենք, որ Քիմբոլը ռուս-ամերիկյան պայմանավորվածությունները գնահատել է որպես «աննախադեպ բեկում»:
Քիմբոլը կարծում է, որ Ասադն այլընտրանք չունի՝ նա պետք է համագործակցի միջազգայն հանրության հետ:
