Անգլիայի ամենանախանձելի փեսացուն՝ արքայազն Հարին, սեպտեմբերի 15-ին նշում է իր ծննդյան 29-ամյակը:
Արքայազն Չարլզի և արքայադուստր Դիանայի կրտսեր որդին խիզախորեն կարող է հավակնել թագավորական ընտանիքի համաժողովրդական սիրելի անդամի կոչմանը: Հմայիչ և ժպտերես Հարին վայելում է աղջիկների սերը, իսկ լրագրողները նրան սիրում են այն պատճառով, որ ժամանակ առ ժամանակ նա հայտնվում է սկանդալային պատմությունների կենտրոնում, ինչը հատուկ չէ թագավորական ընտանիքի անդամներին: Հիշենք, օրինակ, Հարիի լասվեգասյան աղմկահարույց երեկույթները:
Արքայազնի իրական անունը ոչ թե Հարի է, այլ Հենրի, ավելի ճշգրիտ՝ Հենրի Չարլզ Ալբերտ Դևիդ Մաունթբեթեն-Վինձոր:
Դպրոցում Հարիի սիրած առարկան եղել է կենսաբանությունը: Նա սիրում է ծաղիկներ և հետաքրքրվում այգեգործությամբ: Իսկ ահա դպրոցական տարիներին նա դժվարությամբ էր աշխարհագրություն սովորում:
Հարցազրուցներից մեկում Հարին խոստովանել է, որ հազվադեպ է գրքեր կարդում, իսկ դպրոցում գրքերն ուղղակի ատում էր:
Դեռահասության տարիներին արքայազնը Spice Girls խմբի մեծ երկրպագուներից էր: 1997թ. 13-ամյա Հարին Հարավային Աֆրիկայում հանդիպել է խմբի մենակատարների հետ, որտեղ հոր հետ այցելել էր նրանց համերգին: Արքայազնը այն ժամանակ շատ էր ուրախացել, երբ Էմմա Բարտոնը համբուրել էր նրա այտը:
Արքայազնը սիրում է արագ սնունդ և պաղպաղակ, իսկ սիրած ըմպելիքը կոկա-կոլան է: Չնայած դրան՝ նա չի գիրանում՝ հավանաբար այն պատճառով, որ զբաղվում է սպորտով՝ խաղում ռեգբի, պոլո, լեռնադահուկներ քշում և զբաղվում է լեռնագնացությամբ:
Հարին Star Trek ֆիլմի երկրպագուն է, իսկ մի քանի տարի առաջ թերթերը գրել էին, որ արքայազնը ցանկանում է տիեզերք թռչել:
Վերջին ժամանակներս լուրեր են պտտվում, որ Հարին պատրաստ է առաջարկություն անել իր ընկերուհուն՝ Կրեսիդա Բոնեին: Անցյալում արքայազնը վեց տարի շարունակ հանդիպում էր իր մանկության ընկերուհու՝ Չելսի Դևիի հետ:
Հարին կապիտանի կոչում ունի: Նա մի քանի շքանշանների է արժանացել, այդ թվում նաև՝ Աֆղանստանում ռազմական արշավին մասնակցելու համար:
Երբ հայտնի է դարձել արքայազնի սերը երեկույթների, ալկոհոլի ու թեթև թմրանյութերի հանդեպ, մամուլը նրան կնքել է «վայրի երեխա» անունով, սակայն նրան կոչում են նաև «ժպտերես արքայազն», «երջանիկ արքայազն», իսկ մոտ ընկերների շրջանում նա կրում է Սփայք մականունը, որի ծագումը անհայտ է:
Իթոնի թագավորական քոլեջն ավարտելուց հետո Հարին մի քանի ամիս ապրել է Ավստրալիայում և Աֆրիկայում, որտեղ աշխատել է որբ երեխաների հետ և օգնել ՁԻԱՀ-ով հիվանդներին: Աֆրիկյան Լեսոտո պետությունում նկարահանել է «Մոռացված թագավորություն» ֆիլմը՝ որբերի մասին:
